कोलम्बो, 16 फरवरी (हि.स.)। भारतीय क्रिकेट टोलीले आईसीसी पुरुष टी-२० विश्वकप २०२६ मा ठूलो जित दर्ता गर्दै चिरप्रतिद्वन्द्वी पाकिस्तानलाई ६१ रनले पराजित गर्यो। यो टी-२० विश्वकप इतिहासमा पाकिस्तानमाथि भारतको रनको अन्तरले सबैभन्दा ठूलो जित थियो। यो जितसँगै भारत सुपर ८ चरणमा छनोट भएको छ र लगातार तीन जितसहित समूह ए मा शीर्ष स्थानमा आफ्नो ठाउॅं सुनिश्चित गरेको छ।
आर. प्रेमदासा स्टेडियममा खेलिएको खेलमा भारतले पहिले ब्याटिङ गर्दै २० ओभरमा ७ विकेट गुमाएर १७५ रन बनायो। इशान किशनले ४० बलमा ७७ रनको आक्रामक इनिङ खेले, जसमा १० चौका र ३ छक्का समावेश थिए। सूर्यकुमार यादवले पनि ३२ रन योगदान दिए। पाकिस्तानका लागि सइम अयुबले ३ विकेट लिए।
१७६ रनको लक्ष्य पछ्याउँदै पाकिस्तानको शुरुवात खराब रह्यो। हार्दिक पाण्ड्याले पहिलो ओभरमै साहिबजादा फरहानलाई रिंकु सिंहको हातबाट क्याच गराए। त्यसपछि जसप्रीत बुमराहले शुरुवाती प्रहार गर्दै साईम अयुब र सलमान अली आगालाई आउट गरे।
पाकिस्तान १८ ओभरमा ११४ रनमा अलआउट भयो। उस्मान खानले सर्वाधिक ४४ रन बनाए, तर अर्को छेउबाट पर्याप्त सहयोगको अभाव देखियो। भारतका लागि बुमराह, हार्दिक, अक्षर पटेल र वरुण चक्रवर्तीले दुई-दुई विकेट लिए भने कुलदीप यादव र तिलक वर्माले एक-एक विकेट लिए।
यो जितसँगै भारतले प्रतियोगितामा आफ्नो दाबी मात्र बलियो बनाएन, तर नेट रन रेटमा पनि उल्लेखनीय फाइदा उठायो। टोलीको आत्मविश्वास उच्च छ र अब सुपर ८ चरणमा बलियो प्रदर्शन गर्ने लक्ष्य राख्नेछ।
हिन्दुस्थान समाचार / भवानी थामी
