काठमाडौँ, 18 अप्रेल (हि.स.)। सार्वजनिक यातायात प्रणालीलाई अझ सुरक्षित बनाउने उद्देश्यले नेपाल सरकारले सबै सार्वजनिक सवारी साधनमा सीसीटीभी क्यामेरा अनिवार्य बनाउने निर्णय गरेको छ। नेपालको गृह मन्त्रालयले 20 दिनभित्र यसलाई कडाइका साथ कार्यान्वयन गर्न देशभरका जिल्ला प्रशासनलाई निर्देशन दिएको छ।

मन्त्रालयले जारी गरेको निर्देशनमा लामो र छोटो दुरीमा चल्ने सबै सार्वजनिक सवारी साधनमा सीसिटीभी क्यामेरा जडान गर्नु अनिवार्य हुने उल्लेख छ। ट्राफिक व्यवस्थापन कार्यालय र जिल्ला ट्राफिक पुलिस कार्यालयद्वारा यसको अनुगमन गरिनेछ।

यसका साथै काठमाडौँ, पोखरा, बीरगञ्ज र बिराटनगरजस्ता प्रमुख महानगरहरूमा चल्ने स्थानीय बसहरूमा पनि सीसीटीभी प्रणाली अनिवार्य गरिएको छ। यस कार्यको सफल कार्यान्वयनका लागि देशभरका ट्राफिक समितिहरूलाई सहयोग गर्न आग्रह गरिएको छ।

मन्त्रालयले आफ्नो विज्ञप्ति जारी गर्दै निर्धारित समयसीमा सकिएपछि नियमित निरीक्षण र अनुगमन गरिने स्पष्ट पारेको छ। कुनै पनि सार्वजनिक गाडीमा सीसीटीभी क्यामेरा नभेटिएको खण्डमा सम्बन्धित गाडी मालिक र अपरेटरहरू विरुद्ध कडा कारबाही गरिनेछ।

नेपाल सरकारको यो निर्णय यात्रुहरूको सुरक्षा सुनिश्चित गर्ने र अपराध नियन्त्रण गर्ने दृष्टिकोणबाट महत्वपूर्ण कदम मानिएको छ।

---------------

हिन्दुस्थान समाचार / भवानी थामी