कोलकाता, 23 अप्रेल (हि.स.)। पश्चिम बङ्गाल विधानसभा चुनाउ 2026 को पहिलो चरण बिहीबार बिहान 152 विधानसभा निर्वाचन क्षेत्रमा शुरु भयो। मतदान शुरु भएको केही मिनेटपछि प्रधानमन्त्री नरेन्द्र मोदीले जनतालाई ठूलो सङ्ख्यामा मतदान गर्न अपील गरे। उनले यसलाई लोकतन्त्रको उत्सव भन्दै अधिकतम सहभागिता सुनिश्चित गर्न आग्रह गरे।

सोसल मिडियामा एक सन्देशमा प्रधानमन्त्री मोदीले पश्चिम बङ्गाल विधानसभा चुनाउको पहिलो चरणको मतदान आज भइरहेको बताएका छन्। उनले राज्यका नागरिकहरूलाई उत्साहपूर्वक मतदान गर्न अपिल गरे। उनले युवाहरू र विशेष गरी महिलाहरूलाई ठूलो सङ्ख्यामा मतदान केन्द्रमा पुग्न आग्रह गरे।

पहिलो चरणमा राज्यका 16 जिल्लाका 152 सिटमा निर्वाचन भइरहेको छ। यसमा दार्जिलिङ, कालेबुङ, जलपाइगढी, अलीपुरद्वार, कुचबिहार, उत्तर दिनाजपुर, दक्षिण दिनाजपुर, माल्दा, मुर्शिदाबाद, बीरभूम, पश्चिम बर्धमान, पुरुलिया, बाँकुरा, झारग्राम, पश्चिम मेदिनीपुर र पूर्व मेदिनीपुर पर्छन्।

निर्वाचन आयोगले स्वतन्त्र, निष्पक्ष र शान्तिपूर्ण मतदान सुनिश्चित गर्न राज्यभरि लगभग 2,400 केन्द्रिय बल कम्पनीहरू तैनाथ गरेको छ। उपलब्ध तथ्याङ्कअनुसार पूर्व मेदिनीपुरमा सबैभन्दा बढी 273 कम्पनी तैनाथ गरिएको छ भने पश्चिम मेदिनीपुरमा 271 कम्पनी तैनाथ गरिएको छ। यसबाहेक मुर्शिदाबादमा 240, बाँकुरामा 193, बीरभूममा 176, मालदामा 172 र पुरुलियामा 151 कम्पनी तैनाथ छन्।

पहिलो चरणको मतदानका लागि 2,958 सहायक मतदान केन्द्रसहित कुल 44,376 मतदान केन्द्र स्थापना गरिएको छ। तीमध्ये 5,487 शहरी र 35,931 ग्रामीण क्षेत्रमा अवस्थित छन्।

उल्लेखनीय छ भने, 5,644 मतदान केन्द्रहरू पूर्ण रूपमा महिला कर्मचारीहरूद्वारा सञ्चालित छन्। यसका अतिरिक्त 207 वटा मोडल मतदान केन्द्र स्थापना गरिएको छ।

यस चरणमा 167 महिलासहित कुल 1 हजार 478 उम्मेदवार चुनावी मैदानमा छन्। कुचबिहार दक्षिण, करन्डिघी र इटाहार सिटमा सबैभन्दा बढी 15 जना उम्मेदवार छन् भने चन्द्रकोना सिटमा सबैभन्दा कम पाँच जना उम्मेदवार छन्।

मतदाताको तथ्याङ्कअनुसार 100 वर्षभन्दा माथिका 4,025 मतदाताहरू छन् भने 2 लाख 46 हजार मतदाताहरू 85 वर्षभन्दा माथिका छन्। अपाङ्ग मतदाताको सङ्ख्या 2 लाख 53 हजार 244 रहेको छ। कडा सुरक्षा, व्यापक निगरानी र शीर्ष नेतृत्वको अपिलको बिचमा, पहिलो चरणको मतदान राज्यको चुनावी मार्ग निर्धारण गर्न महत्त्वपूर्ण मानिएको छ।

---------------

हिन्दुस्थान समाचार / भवानी थामी