तेहरान, २५ अप्रेल (हि.स.)। ईरानले स्पष्ट पारेको छ कि विदेशमन्त्री अब्बास अराघचीको इस्लामाबाद भ्रमणका क्रममा अमेरिकासँग वार्ता गर्ने कुनै योजना हाल छैन। अराघचीको नेतृत्वमा ईरानी प्रतिनिधिमण्डल इस्लामाबाद पुगेको छ। ईरानले जनाएको छ, यस भ्रमणमा ईरान-अमेरिका बीच कुनै प्रत्यक्ष बैठक तय गरिएको छैन।
यता अमेरिकाले भने आफ्नो विशेष दूत स्टीव विटकफ र व्हाइट हाउसका सल्लाहकार जेरेड कुशनर शनिबार ईरानसँग वार्ताका लागि इस्लामाबाद जाने बताएको छ।
ईरानका विदेशमन्त्री अब्बास अराघचीको नेतृत्वमा प्रतिनिधिमण्डल शुक्रबार राति पाकिस्तानी नेताहरूसँग छलफल गर्न इस्लामाबाद पुगेको हो। ईरान इन्टरनेशनलका अनुसार, संसदको राष्ट्रिय सुरक्षा तथा विदेश नीति समितिका प्रमुख इब्राहिम अजीजीले बताएका छन्, अराघचीको पाकिस्तान भ्रमण केवल द्विपक्षीय मुद्दाहरूमा केन्द्रित छ र यसको परमाणु वार्तासँग कुनै सम्बन्ध छैन।
अजीजीले सामाजिक सञ्जालमा लेखेका छन्, “तेहरानमा विदेशी पत्रकारहरूसँग भेटघाट गरे र उनीहरूलाई हाम्रो देशको वास्तविक चित्र प्रस्तुत गर्न आएकोमा धन्यवाद दिएँ। उक्त भेटमा मैले स्पष्ट पारेँ कि विदेशमन्त्री अराघचीको पाकिस्तान भ्रमण केवल द्विपक्षीय सम्बन्धबारे छलफलका लागि हो र उनलाई परमाणु वार्तासम्बन्धी कुनै जिम्मेवारी दिइएको छैन, जुन ईरानका प्रमुख संवेदनशील विषयहरूमध्ये एक हो।”
पाकिस्तानी सञ्चारमाध्यमका अनुसार, ईरानी विदेशमन्त्री शुक्रबार राति इस्लामाबाद पुगेका हुन्। पाकिस्तानका विदेशमन्त्री इशाक डारले सामाजिक सञ्जाल ‘एक्स’ मार्फत उनको आगमनबारे जानकारी दिएका थिए। ईरानी विदेश मन्त्रालयका प्रवक्ता इस्माइल बाघेई पनि प्रतिनिधिमण्डलमा सहभागी छन्।
तर अमेरिकाले भने तेहरानले ट्रम्प प्रशासनसँग सम्पर्क गरेपछि आफ्नो टोली वार्ताका लागि पठाउने जनाएको छ। व्हाइट हाउसकी प्रेस सचिव क्यारोलिन लीविटका अनुसार, ईरानले वार्ताको अनुरोध गरेको थियो।
---------------
हिन्दुस्थान समाचार / बिशाल
