नयाँ दिल्ली, 29 अप्रेल (हि.स.)। राष्ट्रिय राजधानी दिल्ली र वरपरको मौसममा आज बिहान अचानक परिवर्तन भयो। तीव्र हावा चल्यो, बिजुली चम्कियो र केही समय पानी पऱ्यो, जसले गर्दा गर्मीबाट राहत मिल्यो। नोएडा र गाजियाबादमा पनि रमाइलो मौसम देखिएको छ। भारतीय मौसम विभाग (आईएमडी) ले यस सम्बन्धमा उपग्रह तस्बिरहरू साझा गरेको छ। विभागले आज असम, मेघालय, नागाल्याण्ड, मणिपुर, मिजोरम, त्रिपुरा र सिक्किमका केही भागहरूमा भारी वर्षा हुने अनुमान गरेको छ।

आईएमडी अनुसार, दिल्ली-एनसीआरमा आज र भोली बादल लाग्ने अपेक्षा गरिएको छ। हल्का पानी पनि पर्नसक्छ। आंधी-तूफानको सम्भावना छ। सप्ताहन्तमा मौसम सामान्यमा फर्कने सम्भावना छ। आज दिल्लीमा अधिकतम तापक्रम 37 देखि 39 डिग्री सेल्सियस र न्यूनतम तापक्रम 26 देखि 28 डिग्री सेल्सियसबीच रहनसक्छ। मंगलवार राजधानीमा अधिकतम तापक्रम 39.2 डिग्री सेल्सियस र न्यूनतम 28.4 डिग्री सेल्सियस रेकर्ड गरिएको थियो।

भारतीय मौसम विज्ञान विभागले छत्तीसगढ़, कर्नाटक, जम्मू कश्मीर, लद्दाख, केरल, मध्य प्रदेश र विदर्भ लगायत धेरै राज्यहरूमा 40 देखि 50 किलोमिटर प्रतिघण्टाको गतिमा तीव्र हावा चल्ने र चट्याङ पर्ने अनुमान गरेको छ। आज पश्चिम बंगालका केही क्षेत्रमा पनि भारी वर्षा हुने अनुमान गरिएको छ। हिमाचल प्रदेश र उत्तराखण्डका केही क्षेत्रमा मेघगर्जन र असिना पर्ने अनुमान गरिएको छ।

हिन्दुस्थान समाचार / भवानी थामी