पाकिम, 26 मई (हि.स.)। आगामी “विश्व धूम्रपान मुक्त दिवस” लाई ध्यानमा राख्दै स्वास्थ्य तथा परिवार कल्याण विभाग, पाकिम जिल्लाले पाकिम पुलिस थाना र माछोङ प्राथमिक स्वास्थ्य केन्द्रको समन्वयमा मंगलबार माछोङ क्षेत्रमा सिगरेट तथा अन्य सुर्तीजन्य पदार्थ ऐन (कोट्पा), २००३ अन्तर्गत प्रवर्तन अभियान सञ्चालन गर्यो।
अभियानअन्तर्गत माछोङ प्राथमिक स्वास्थ्य केन्द्र क्षेत्र, नजिकका व्यापारिक प्रतिष्ठानहरू तथा सरकारी वरिष्ठ माध्यमिक विद्यालय माछोङ, पराखा कनिष्ठ उच्च माध्यमिक विद्यालय र सरकारी माध्यमिक विद्यालय लिङ्के आसपासका क्षेत्रहरू समेटिएका थिए।
प्रवर्तन टोलीमा जिल्ला सुर्ती नियन्त्रण कक्ष (डीटीसीसी), पाकिम जिल्लाकी कार्यक्रम संयोजक डा. दिग्छा श्री राई, माछोङ प्राथमिक स्वास्थ्य केन्द्रका चिकित्सा अधिकारी डा. बिद्युत राई, दन्त चिकित्सक डा. भावना शर्मा तथा पाकिम प्राथमिक स्वास्थ्य केन्द्रकी दीपिका छेत्री सहभागी थिए। अभियानलाई पाकिम पुलिसका हेड कन्स्टेबल पाल्देन दोर्जे भोटिया तथा एसए छिरिङ डेन्का भोटियाले सहयोग गरेका थिए।
निरीक्षणका क्रममा विभिन्न पसल तथा सार्वजनिक स्थानहरूमा कोट्पा नियमहरूको पालना भए नभएको जाँच गरियो, जसअन्तर्गत खुल्ला रूपमा सिगरेट बिक्रीमा प्रतिबन्ध तथा शैक्षिक संस्थानबाट १०० गजभित्र सुर्तीजन्य पदार्थ बिक्री निषेधको व्यवस्था समावेश थियो। साथै सार्वजनिक तथा व्यापारिक प्रतिष्ठानहरूमा “धूम्रपान निषेध” सम्बन्धी सूचना अनिवार्य रूपमा राखिएको छ वा छैन भन्ने पनि सुनिश्चित गरियो।
सुर्तीजन्य पदार्थ सेवनका हानिकारक प्रभावहरू तथा सुर्ती नियन्त्रणसम्बन्धी कानुनहरूको पालना गर्नुको महत्वबारे पसलेहरू तथा सर्वसाधारणलाई जनचेतना समेत फैलाइएको थियो।
नियम उल्लङ्घन गर्ने व्यक्तिहरूबाट चलानमार्फत जम्मा ६ सय रुपियाँ जरिवाना संकलन गरिएको बताइएको छ। केही व्यापारिक प्रतिष्ठानहरूबाट अवैध सुर्तीजन्य पदार्थहरू जफत गरिएको थियो भने पहिलो पटक उल्लङ्घन गर्नेहरूलाई चेताउनी दिइयो।
स्वास्थ्य तथा परिवार कल्याण विभागले पाकिम पुलिसलाई सहयोगका लागि धन्यवाद व्यक्त गर्दै सुर्तीमुक्त जिल्ला निर्माणका लागि नियमित कार्यान्वयन तथा जनचेतनामूलक गतिविधिहरू निरन्तर सञ्चालन गर्ने प्रतिबद्धता दोहोर्याएको छ।
---------------
हिन्दुस्थान समाचार / बिशाल
