नयाँ दिल्ली, १५ जून (हि.स.)। प्रधानमन्त्री नरेन्द्र मोदीले आज एक संस्कृत सुभाषित साझा गर्दै नवप्रवर्तन (इनोभेसन) र उद्यमशीलताको क्षेत्रमा विविध विचार, प्रतिभा तथा सिर्जनात्मक दृष्टिकोणको महत्वपूर्ण भूमिकामाथि प्रकाश पारेका छन्। उनले प्रत्येक व्यक्तिको सोच र कार्यशैली फरक हुने र यही विविधताले नयाँ विचार तथा सम्भावनाहरूको जन्म गराउने बताएका छन्।
प्रधानमन्त्रीले सामाजिक सञ्जाल एक्समा आफ्नो सन्देशमार्फत भनेका छन्, जसरी विभिन्न स्रोतबाट प्राप्त पानीको स्वाद फरक-फरक हुन्छ, त्यसरी नै प्रत्येक व्यक्तिको प्रतिभा, दृष्टिकोण र योगदान पनि विशिष्ट हुन्छ। उनले विविध विचार र क्षमताहरूको संगमबाट नै नवप्रवर्तन, उद्यमशीलता तथा प्रगतिको मार्ग प्रशस्त हुने बताए।
यस अवसरमा प्रधानमन्त्रीले संस्कृतको एक सुभाषित साझा गरेका छन्-
“पिण्डे पिण्डे मतिर्भिन्ना कुण्डे कुण्डे नवं पयः। जातौ जातौ नवाचाराः नवा वाणी मुखे मुखे॥”
यस सुभाषितको अर्थ प्रत्येक व्यक्तिको सोच, बुद्धि र सिर्जनात्मक दृष्टिकोण फरक-फरक हुने तथा यही भिन्नता नै नवप्रवर्तनको सबैभन्दा ठूलो शक्ति हो भन्ने हो। समाजमा रहेका विविध प्रतिभा, अनुभव र विचारहरूले मिलेर विकास तथा प्रगतिलाई नयाँ दिशा प्रदान गर्छन्।
प्रधानमन्त्री मोदीले भारतको नवप्रवर्तन संस्कृति पनि यही भावनामा आधारित रहेको उल्लेख गर्दै विभिन्न पृष्ठभूमि र अनुभव भएका व्यक्तिहरूले आफ्ना विचार र क्षमतामार्फत राष्ट्र निर्माणमा महत्वपूर्ण योगदान पुर्याइरहेको बताए।
---------------
हिन्दुस्थान समाचार / भवानी थामी
