गौतम बुद्ध नगर, १५ जून (हि.स.)। उत्तर प्रदेशको जेवरस्थित नोएडा अन्तरराष्ट्रिय विमानस्थलमा सोमबार बिहान ऐतिहासिक क्षण दर्ता भयो। यस विमानस्थलबाट व्यावसायिक उडान सञ्चालन औपचारिक रूपमा शुरु भएको छ। लखनउस्थित चौधरी चरण सिंह इन्टरनेशनल एयरपोर्टबाट इन्डिगोको पहिलो निर्धारित व्यावसायिक उडान 6ई-2278 बिहान ८:०५ बजी नोएडा विमानस्थलमा अवतरण गरेको थियो। यसअघि केन्द्रिय नागरिक उड्डयनमन्त्री राम मोहन नायडू किंजरापुले नोएडा अन्तरराष्ट्रिय विमानस्थलको उद्घाटन गरेका थिए।
व्यावसायिक सञ्चालनको शुरुआत लखनउबाट बिहान ८:०० बजी प्रस्थान गरेको इन्डिगोको निर्धारित उडान 6ई-2278 मार्फत भएको हो। उक्त उडानले आफ्नो यात्रा निरन्तरता दिँदै बेङलुरुतर्फ प्रस्थान गर्नेछ। केन्द्रिय मन्त्री किन्जरापुले पहिलो व्यावसायिक उडानलाई बिदाइ गर्नुअघि केक काटेर यात्रुहरूलाई विशेष स्मारक उडान टिकट वितरण गरेका थिए।
नोएडा विमानस्थलबाट पहिलो उडान बिहान ८:३० बजी लखनउका लागि प्रस्थान गर्यो। उक्त उडानमा विमानस्थल निर्माणका लागि जग्गा उपलब्ध गराउने १७० किसान तथा श्रमिक सहभागी थिए। तीमध्ये केही महिला पनि रहेका थिए।
मन्त्री किन्जरापुले भने, “आज अत्यन्त खुशीको दिन हो। १७० किसान यहाँबाट पहिलो उडानमार्फत लखनउ जाँदैछन्। बेङलुरुका लागि पनि उडान तयार अवस्थामा छ। यो उडान आफ्नो यात्रा जारी राख्दै बेङलुरु पुग्नेछ र बिहान ११:०५ बजी त्यहाँ अवतरण गर्नेछ।”
उनले थप जानकारी दिँदै भने, आजदेखि यहाँबाट चारवटा गन्तव्यका लागि नियमित उडान सेवा शुरु हुनेछ। यो विमानस्थल देशका शीर्ष पाँच विमानस्थलमध्ये एक बन्नेछ।
उल्लेखनीय छ, इन्डिगो र आकासा एयर जस्ता प्रमुख वायुसेवा कम्पनीहरूले लखनउ, बेङलुरु, हैदराबाद, मुम्बई र अमृतसरलगायत विभिन्न सहरका लागि आफ्नो उडान सेवा शुरु गरिसकेका छन्।
---------------
हिन्दुस्थान समाचार / भवानी थामी
