सिएटल, 27 जून (हि.स.)। इजिप्ट र इरानले शनिबार फिफा विश्वकप 2026 को ग्रुप जी को अन्तिम खेलमा 1-1 को रोमाञ्चक बराबरी खेलेका छन्। यस परिणामसँगै इजिप्ट समूहको दोस्रो स्थानमा रहेको टोलीको रूपमा नकआउट चरणमा पुगेको छ, जबकि इरानको अन्तिम-32 मा पुग्ने आशा उत्कृष्ट तेस्रो स्थानमा रहेका टोलीहरूमा टिकेको छ।

खेलको शुरुवात निकै तीव्र भएको थियो। इजिप्टले पाँचौँ मिनेटमा महमुद साबेरको गोलबाट अग्रता बनाएको थियो। त्यसपछि इरानले नवौं मिनेटमा पेनल्टी पायो, तर मेहदी तारेमीले यसलाई गोलमा परिणत गर्न सकेनन्। इजिप्टका गोलकिपर मोस्तफा शुबीरले उत्कृष्ट सेभ गरे।

तर, इरानले पाँच मिनेटपछि पुनरागमन आक्रमण गरेको थियो। मिलाद मोहम्मदीको पहिलो प्रयासलाई शुबीरले रोके पनि रिबाउन्डमा रामिन रेजाइयानले 14 औँ मिनेटमा गोल गर्दै स्कोर 1-1 गरे।

दोस्रो हाफमा दुवै टोलीले जितका लागि निरन्तर प्रयास गरे। इरानले अन्तिम मिनेटमा धेरै राम्रा अवसरहरू पाएको थियो। सोजा खलिलजादेहले स्टपेज समयमा गोल गरे र इरानी खेलाडीहरूले उत्सव मनाउन थाले, तर भिडियो सहायक रेफ्री (भीएआर) समीक्षाले उनलाई अफसाइड भएको बताउँदै गोल रद्द गरिदियो।

दोस्रो खेलमा बेल्जियमले न्युजिल्यान्डलाई 4-1 ले हराएर समूहको शीर्ष स्थानमा रह्यो। फलस्वरूप इजिप्ट दोस्रो स्थानमा झरेको छ।

इजिप्टले अब अन्तिम-32 मा अस्ट्रेलियाको सामना गर्नेछ। साथै, इरानले अब अन्य समूहको नतिजाको प्रतिक्षा गर्नुपर्नेछ।

हिन्दुस्थान समाचार / बिशाल