कोलकाता, १९ अगस्त (हि.स.)। पश्चिम बंगाल पुलिसको विशेष कार्यदल (एसटीएफ) ले पाकिस्तानको गुप्तचर संस्था आईएसआईसँग सम्बन्ध रहेको आरोप लागेका पाकिस्तानी नागरिक वहाब आलमका तेस्रो स्थानीय सहयोगीलाई पक्राउ गरेको छ। पक्राउ पर्नेको नाम जफर शम्स उर्फ सनी हो। आलमलाई यसै महिनाको शुरुवातमा उत्तर २४ परगना जिल्लाको हाबराबाट पक्राउ गरिएको थियो।
पुलिसका अनुसार, पूर्वी कोलकाताको तोपसियाका निवासी सनी आलम पक्राउ परेदेखि फरार थिए। एसटीएफले उनलाई हुगली जिल्लाको रिषडाबाट पक्राउ गरेको हो। यद्यपि पुलिसले उनको पक्राउको समय तथा कारबाहीसँग सम्बन्धित अन्य विवरण तत्काल सार्वजनिक गरेको छैन।
एसटीएफका अधिकारीहरूले सनीसँग सोधपुछ गरी उनी आलमका कथित गतिविधिमा कसरी संलग्न थिए भन्नेबारे जानकारी जुटाउने प्रयास गरिरहेका छन्। एक पुलिस अधिकारीका अनुसार, अनुसन्धानकर्ताहरूलाई सनीले भारतबाट गोप्य सूचना पाकिस्तानको गुप्तचर संस्था आईएसआईसम्म पुर्याउन आलमले तयार गरिरहेको कथित गोप्य नेटवर्कलाई बलियो बनाउन भूमिका खेलेको हुनसक्ने आशंका छ।
यसअघि दुई दिनअघि एसटीएफले आलमका अर्का सहयोगी इमरान हुसेनलाई तोपसियास्थित उनको घरबाट पक्राउ गरेको थियो। त्यसअघि आलमका निकट सहयोगी मोहम्मद इजाजलाई पनि सोही क्षेत्रबाट पक्राउ गरिएको थियो।
अनुसन्धानका क्रममा आलम २०१२ मा नेपाल हुँदै अवैध रूपमा पश्चिम बंगाल प्रवेश गरेको खुलेको छ। त्यसपछि उनी इजाजको घरमा बस्दै आएका थिए। आरोपअनुसार, इजाजले पाकिस्तानी नागरिक आलमका लागि भारतीय पहिचानसँग सम्बन्धित कागजात तयार गराउन सहयोग गरेका थिए।
एसटीएफले आलम, इजाज र इमरानसँग छुट्टाछुट्टै तथा पछि संयुक्त रूपमा गरिएको सोधपुछका क्रममा सनीबारे जानकारी प्राप्त गरेको जनाएको छ।
यसैबीच, एसटीएफले १४ अगस्त राति भारत-बंगलादेश सीमासँग जोडिएको कूचबिहार जिल्लाको साहेबगञ्ज क्षेत्रबाट अन्य तीन जना कथित पाकिस्तानी जासुसलाई पनि पक्राउ गरेको थियो। उनीहरूको पहिचान राशिदुल हक, नूर नसीरुद्दीन अली र शफीकुल इस्लामका रूपमा गरिएको छ। उनीहरू तीनै जना भारतीय नागरिक रहेको बताइएको छ।
यता, राष्ट्रिय अनुसन्धान एजेन्सी (एनआईए) ले पनि वहाब आलमबारे जानकारी संकलन गर्न थालेको छ। एसटीएफको प्रारम्भिक अनुसन्धानमा आलमको आईएसआईसँग कथित सम्बन्ध देखिएपछि एनआईएले पश्चिम बंगाल एसटीएफसँग अनुसन्धान तथा हालसम्म संकलन गरिएको जानकारी मागेको छ।
एनआईएले आलम र इजाजसँग सोधपुछ गर्नेछ। आवश्यक परे इमरान हुसेन तथा कूचबिहारबाट पक्राउ परेका अन्य तीन आरोपितसँग पनि सोधपुछ गर्न सकिने बताइएको छ।
हिन्दुस्थान समाचार / भवानी थामी
