नयाँ दिल्ली, 30 अगस्त (हि.स.)। उज्बेकिस्तानका राष्ट्रपति शावकत मिर्जियोयेभले आइतवार प्रधानमन्त्री नरेन्द्र मोदीलाई देशको सर्वोच्च राजकीय पुरस्कार 'ओलिय़ दराजाली दोस्तलिक' (सर्वोच्च मैत्री पुरस्कार) ले सम्मानित गरेका छन्।

यस अवसरमा बोल्दै प्रधानमन्त्रीले उज्बेकिस्तानको सर्वोच्च सम्मान प्राप्त गर्नु आफ्ना लागि निकै गर्वको क्षण भएको बताए। यो सम्मान 140 करोड़ भारतीयहरूको सम्मान हो र सबै भारतीयहरूको तर्फबाट म उज्बेकिस्तानका जनता, यहाँको सरकार र मेरा साथी माननीय राष्ट्रपतिलाई हार्दिक कृतज्ञता व्यक्त गर्दछु, उनले भने।

सम्मानलाई ठूलो जिम्मेवारी भन्दै प्रधानमन्त्रीले भारतले आफ्नो जिम्मेवारीबाट कहिल्यै भाग्ने छैन र यो मित्रतालाई पूर्ण रूपमा पूरा गर्ने बताए। दुवै देश मिलेर ग्लोबल साउथको एकताबद्ध आवाज बन्ने र यसको कल्याण र सम्पूर्ण मानवताको हितमा समर्पणका साथ काम गर्ने उनले बताए।

दुई देशको शताब्दीयौँ पुरानो मित्रता र साझा सम्पदालाई सम्मान समर्पित गर्दै प्रधानमन्त्रीले उज्बेकिस्तानका राष्ट्रपतिको दूरदर्शी नेतृत्व र भारतप्रतिको उनको मित्रताले द्विपक्षीय सम्बन्धलाई निरन्तर सुदृढ़ पारेको बताए। यसको परिणाम स्वरूप आज दुई देशबीचको सम्बन्धले व्यापक रणनीतिक साझेदारीको नयाँ स्तर हासिल गरेको उनले बताए।

यसअघि उज्बेकिस्तानका राष्ट्रपतिले खुलापन र भाइचाराको भावनामा सम्पन्न फलदायी छलफलका लागि प्रधानमन्त्री मोदीलाई धन्यवाद दिए। उनले भारतको द्रूत प्रगति र विश्वव्यापी मञ्चमा बढ्दो प्रभावको प्रशंसा गर्दै यसलाई प्रधानमन्त्री मोदीको नेतृत्वसँग जोड़ेका छन्। दुई देशबीचको सम्बन्ध ऐतिहासिक रूपमा नयाँ स्तरमा पुगेको उनले बताए। व्यापार, लगानी, यातायात, पर्यटन, संस्कृति र पर्यावरण लगायत विभिन्न क्षेत्रमा सहयोग सुदृढ़ भएको छ।

राष्ट्रपतिले दुवै देशसँग अपार सम्भावना रहेको र हालको एक अरब डलरको व्यापार लक्ष्य मात्रै नभएर शुरूआत भएको बताए। उनले भविष्यमा व्यापारलाई पाँच अरब डलर र थप दश अरब डलरसम्म लैजाने आकांक्षा व्यक्त गरे।

/ बिशाल