गुवाहाटी, 06 अगस्त (हि.स.)। असममा आएको बाढीले माथिल्लो असमका चार जिल्लाहरू, मुख्यतया शिवसागर, चराइदेव, जोरहाट र गोलाघाट निकै प्रभावित भएका छन्। नदीको जलस्तर घटेको भए पनि अझै पनि मानिसहरूको घर र सडकमा पानी र माटो जमेको छ। केही दिन अघि बाढीको प्रभाव 5 जिल्लामा सीमित थियो। अहिले बाढीले 14 वटा जिल्लालाई समेटेको छ।
5 अगस्तमा जारी गरिएको असम राज्य आपदा प्रबन्धन प्राधिकरणको तथ्याङ्कअनुसार, धनसिरी नदी (नुमालीगढ) अझै पनि यस क्षेत्रमा खतराको निशानभन्दा माथि बगिरहेको छ। यसैबीच बुधबार शिवसागर जिल्लामा 2, गोलाघाट जिल्लामा 1 र विश्वनाथ जिल्लामा 2 जनाको शव फेला परेका छन्। यससँगै राज्यमा बाढीका कारण मृत्यु हुने कुल सङ्ख्या 94 पुगेको छ। बाढी प्रभावित जिल्लाहरूमा गोलाघाट, लखीमपुर, चराइदेव, शिवसागर, विश्वनाथ, धेमाजी, कामरूप (मेट्रो), जोरहाट, सोनीतपुर, तिनसुकिया, नागांव, दर्रङ, कार्बी आङ्लोङ र उदलगुरी पर्छन्। बाढीबाट 14 जिल्लाका 38 वटा राजस्व सर्कलका 563 वटा गाउँ प्रभावित भएका छन्। हाल, राज्यका कुल 160653 मानिसहरू अझै पनि प्रभावित छन् र हेक्टर कृषि भूमि पानीमा डुबेको छ।
उद्धार कार्यमा एसडीआरएफ, सेना/अर्धसैनिक, एनडीआरएफ, डीडीआरएफ, वायुसेना, पुलिस, फायर एण्ड इमर्जेन्सी सर्भिस (एफ एन्ड इएस), सर्कल अफिस/स्थानीय प्रशासन, नागरिक सुरक्षा/प्रशिक्षित स्वयंसेवक र फायर डिपार्टमेन्ट संलग्न छन्। बाढीले सडक, पुल र अन्य पूर्वाधारमा व्यापक क्षति पुर्याएको छ। बुधबार केन्द्रिय मन्त्री जेपी नड्डाले मुख्यमन्त्री डा. हिमन्त विस्व सरमासँग असमको सबैभन्दा बढी प्रभावित शिवसागर र चराईदेव जिल्लाहरूको भ्रमण गरी स्थितिको समीक्षा गरेका थिए। उनले प्रभावितलाई सरकारले सबै सम्भव सहयोग गर्ने आश्वासन दिए। नड्डाले नागाल्यान्डको बाढी प्रभावित मोन जिल्लाको पनि भ्रमण गरे। केन्द्रिय मन्त्री नड्डा असम, नागाल्यान्ड र अरुणाचल प्रदेशको तीन दिने भ्रमणमा 4 अगस्तमा डिब्रुगढ आइपुगेका थिए।
--------
/ बिशाल
