कोलकाता, २० सेप्टेम्बर (हि.स.)। दुर्गापूजाअघि साहित्य जगतमा फेरि हलचल हुने भएको छ। ‘लज्जा’, ‘द्विखण्डित’ र ‘मेयबेला’ जस्ता चर्चित कृतिकी लेखिका तसलीमा नसरीन फेरि कोलकाता आउने भएकी छन्। करिब दुई महिनाको अन्तरालपछि तसलीमा महालयाका अवसरमा आयोजित एक कार्यक्रममा सहभागी हुन शहर आउनेछिन्। यस क्रममा उनी केही दिन कोलकातामा रहने सम्भावना छ। यसपटक उनको कार्यक्रम महाजाति सदनमा आयोजना हुने बताइएको छ, जहाँ ‘शिकोल भाङ्गार गल्पो’ अर्थात् ‘जञ्जिर तोड्ने कथा’ मञ्चन गरिनेछ।

जानकारीअनुसार, उक्त कार्यक्रमको निर्देशन तसलीमा नसरीनले गर्नेछिन् भने प्रसिद्ध नृत्यांगना मैत्री पहाडीले नृत्य संयोजन गर्नेछिन्। स्रोतका अनुसार, तसलीमा आगामी ८ अक्टोबरमा कोलकाता पुग्नेछिन् र १२ अक्टोबरसम्म शहरमा रहनेछिन्।

यसरी दुर्गापूजाको मौसममा करिब पाँच दिनसम्म उनका प्रशंसकहरूले आफ्नी प्रिय लेखिकालाई शहरमा भेट्ने अवसर पाउनेछन्। कार्यक्रमका आयोजकहरूको नामबारे भने आधिकारिक जानकारी अहिलेसम्म सार्वजनिक भएको छैन।

करिब दुई दशकको निर्वासनपछि तसलीमा नसरीन गत १ अगस्तमा कोलकाता फर्किएकी थिइन्। त्यसबेला रवीन्द्र सदनमा ‘सेक्युलर मिसन’ नामक संस्थाले आयोजना गरेको कार्यक्रममा उनको स्वागत गरिएको थियो।

मुख्यमन्त्री शुभेन्दु अधिकारीले कार्यक्रममा उनको स्वागत गर्दै तसलीमाको सुरक्षाको जिम्मेवारी लिने आश्वासन दिएका थिए। उनले तसलीमालाई आफूले चाहेको समयमा कोलकाता आउन सक्ने बताएका थिए।

तसलीमाले यसअघि कोलकाताबाट फर्किने क्रममा विमानस्थलमा अक्टोबरमा पुनः आउने सम्भावना रहेको बताएकी थिइन्। अहिले उनी अक्टोबरमा पुनः कोलकाता आउने खबर सार्वजनिक भएको छ।

हिन्दुस्थान समाचार / भवानी थामी