बेङ्गलोर, 05 सेप्टेम्बर (हि.स.)। नेपालमा बेपत्ता भएका कर्नाटकका मानिसहरूको पहिचान र आवश्यक परेमा पार्थिव शरीर स्वदेश ल्याउने प्रक्रियालाई सहज बनाउन बेंगलुरुको बरिङ र लेडी कर्जन अस्पताललाई डीएनए प्रोफाइलिङका लागि नोडल केन्द्र बनाइएको छ। ग्रेटर बेङ्गलुरु प्राधिकरण (जीबीए) का प्रमुख आयुक्तले शनिवार जारी गरेको विज्ञप्तिमा यो जानकारी दिएका हुन्।

विज्ञप्तिमा भनिएको छ, नेपालमा बेपत्ता व्यक्तिहरूको पहिचानमा सहयोग गर्न प्रथम श्रेणीका आफन्तहरूबाट डीएनए नमूना लिइनेछ। बेपत्ता व्यक्तिको आमाबाबु, छोरा वा छोरीले नमूना दिन सक्छन्।

डीएनए नमूना दिने आफन्तले हालको पासपोर्ट साइजको फोटो, आधार कार्ड वा अन्य कुनै सरकारी परिचय पत्र र बेपत्ता व्यक्तिसँगको सम्बन्ध प्रमाणित गर्ने आवश्यक कागजातहरू बोक्नुपर्नेछ।

फोरेन्सिक मेडिसिन विभागका प्राध्यापक तथा प्रमुख डा. नागेश कुप्पस्तलाई नोडल अफिसरमा नियुक्त गरिएको छ। उनलाई 9742707500 मा सम्पर्क गर्न सकिन्छ। आवासीय चिकित्सा अधिकारी डा. वादिराज बी. पोक्कनलाई 9448408640 मा सम्पर्क गर्न सकिन्छ।

जीबीएले थप जानकारी, मार्गदर्शन र आवश्यक सहयोगका लागि हेल्प लाइन नम्बर 1533 मा सम्पर्क गर्न अपील गरेको छ।

हिन्दुस्थान समाचार / भवानी थामी