नयाॅं दिल्ली, 13 अक्टूबर (हि.स.)। पूर्व भारतीय प्रशासनिक सेवाका अधिकारी कन्नन गोपीनाथन सोमबार कांग्रेस पार्टीमा प्रवेश गरेका छन्। उनलाई पार्टीका महासचिव केसी वेणुगोपालले औपचारिक रूपमा सदस्यता दिलाए। यस अवसरमा कांग्रेस प्रवक्ता पवन खेड़ा, जिग्नेश मेवाणी र कन्हैया कुमार पनि उपस्थित थिए।

केसी वेणुगोपालले भने, कन्नन गोपीनाथन ती साहसी अधिकारीहरू मध्येका हुन्, जसले सधैं वञ्चित र सीमान्तमा रहेका मानिसहरूका हकमा आवाज उठाए। उनका अनुसार, गोपीनाथनको कांग्रेस प्रवेशले यो स्पष्ट सन्देश दिन्छ कि कांग्रेस नै त्यस्तो पार्टी हो, जसले न्याय र समानताको विचारधारामा दृढ रहँदै काम गर्छ। उनले थपे, “गोपीनाथनले सन् २०१९ मा राजीनामा दिएका थिए, तर आजसम्म त्यो स्वीकृत गरिएको छैन।”

पवन खेड़ाले भने, कन्नन गोपीनाथन २०१२ ब्याचका आईएएस अधिकारी हुन्। उनले त्यो समयमा बोल्ने साहस देखाए जब देशमा असहमति प्रकट गर्नु कठिन थियो। उनले जम्मु–कश्मीरलाई केन्द्र शासित प्रदेश बनाउने निर्णय, नागरिकता संशोधन ऐन र वीवीपीएटी प्रणाली जस्ता मुद्दाहरूमा केन्द्र सरकारको नीतिको खुलेर विरोध गरेका थिए। उनका विरुद्ध धेरै एफआईआर दर्ता गरियो र प्रशासनिक दबाब पनि दिइयो, तर उनले कहिल्यै हार मानेनन्।

उल्लेखनीय छ, कन्नन गोपीनाथनले ५ अगस्ट, २०१९ मा जम्मु–कश्मीरबाट धारा ३७० हटाउने निर्णय र त्यसपछि लागू गरिएको सञ्चार प्रतिबन्धको विरोधमा आफ्नो पदबाट राजीनामा दिएका थिए। उनले भनेका थिए, “सरकारलाई धारा ३७० हटाउने अधिकार छ, तर नागरिकहरूलाई पनि आफ्नो प्रतिक्रिया जनाउने अधिकार हुनुपर्छ।”

---------------

हिन्दुस्थान समाचार / भवानी थामी