बेलेम (ब्राजिल), 20 नोभेम्बर (हि.स.)। भारतले संयुक्त क्रेडिटिङ्ग मेकानिज्म (जेसीएम) लाई विश्वव्यापी रूपमा न्यायसंगत र ठूला स्तरमा लागू गर्न सकिने जलवायु समाधानको महत्वपूर्ण माध्यम रहेको बताएको छ। भारतका केन्द्रिय पर्यावरण, वन तथा जलवायु परिवर्तन मन्त्री भूपेन्द्र यादवले यहाँ आयोजित संयुक्त राष्ट्र संघको जलवायु परिवर्तन सम्मेलन (कप-३०) का क्रममा जापानको पर्यावरण मन्त्रालयले आयोजना गरेको ११औँ जेसीएम साझेदार देशहरूको बैठकमा यो कुरा भनेका हुन्। उक्त बैठकको अध्यक्षता जापानका पर्यावरण मन्त्री हिरोताका इसिहाराले गरेका थिए।

इसिहाराले भने, जेसीएम साझेदार देशहरूको संख्या बढेर ३१ पुगेको छ र २८० भन्दा बढी परियोजनाहरू पेरिस सम्झौताका अनुच्छेद–६ अन्तर्गत सञ्चालित छन्। यो सहकार्यले दीर्घकालीन लगानी, क्षमता अभिवृद्धि र जलवायु लचिलोपन सम्बन्धी परियोजनाहरूमा देशहरूको सहभागिता सुनिश्चित गर्नेछ।

यादवले भने, संसार ठूला स्तरमा लागू गर्न सकिने, न्यायपूर्ण र प्रविधि–आधारित जलवायु समाधान खोजिरहेको अवस्थामा जेसीएम जस्ता सहकार्य संयन्त्रहरू अत्यन्तै महत्वपूर्ण छन्। उनले यसलाई भारत र जापानबीचको विश्वास, प्रविधिगत सहकार्य र दिगो विकासप्रतिको साझा प्रतिबद्धतामा आधारित सशक्त साझेदारीको प्रतीक बताए।

भारत र जापानबीच यसै वर्ष अगस्त ७ मा भएको सम्झौता पत्रको उल्लेख गर्दै यादवले भने, जेसीएम अनुच्छेद–६ अनुरूप कार्य गर्दछ र यसले सरकार तथा निजी क्षेत्रलाई संयुक्त रूपमा उत्सर्जन कटौतीसम्बन्धी परियोजना विकास गर्न, वित्त जुटाउन, उच्च प्रविधि प्रयोग गर्न र उत्सर्जन घटेको पारदर्शी ढङ्गले साझेदारी गर्न आवश्यक ढाँचा उपलब्ध गराउँछ।यादवले भने, जेसीएमले भारतका राष्ट्रिय स्तरमा निर्धारित योगदान र दीर्घकालीन न्यून उत्सर्जन विकास रणनीतिलाई प्रत्यक्ष लाभ पुर्‍याउनेछ। स्वीकृत न्यून–कार्बन प्रविधिहरूले भारतका दीर्घकालीन लक्ष्यहरूलाई प्रोत्साहन दिने र उन्नत प्रविधिको स्थानीयकरणमा सहयोग पुर्‍याउनेछन्। उनले भने, भारतमा जेसीएम कार्यान्वयनका लागि तयारी तीव्र गतिमा अगाडि बढिरहेको छ। अनुच्छेद–६ का लागि राष्ट्रिय नामित निकायद्वारा नियम र गतिविधि चक्र सम्बन्धी दस्तावेज अन्तिम चरणमा छन्। ऊर्जा दक्षता ब्युरोले भारतीय कार्बन बजार पोर्टल विकास गरिरहेको छ, जसमा जेसीएम र अन्य सहकार्य संयन्त्रहरूको लागि छुट्टै खण्ड हुनेछ, जसले पारदर्शिता र परियोजना सुविधा सुनिश्चित गर्नेछ।

यादवले भने, जेसीएम गतिविधिहरू नवीकरणीय ऊर्जा र भण्डारण, दिगो विमान इन्धन, बायोग्यास, हरित हाइड्रोजन, हरित अमोनिया तथा स्टील, सिमेन्ट र रसायनजस्ता जटिल क्षेत्रमा उत्कृष्ट प्रविधिहरूमाथि केन्द्रित हुनेछन्। यी सबै भारतका विकास प्राथमिकतासँग मेल खाने र सहकार्यका नयाँ अवसर प्रदान गर्ने विषय हुन्।

हिन्दुस्थान समाचार / भवानी थामी