मेदिनीपुर, 21 नोभेम्बर (हि.स.)।
ओडिशा पुलिसले बंगलादेशी नागरिक भएको शंका गर्दै पश्चिम बङ्गालका केही मजदुरलाई नियन्त्रणमा लिएको छ। पूर्व मेदिनीपुर जिल्लाको पांशकुडा क्षेत्रअन्तर्गत राधाबल्लभचकका बासिन्दा रहेका यी व्यक्तिहरू रोजगारीको सिलसिलामा ओडिशाको भद्रक क्षेत्रमा काम गर्दै आएका थिए।
सूत्रहरू अनुसार, बिहिबार साँझ एसआईआर प्रक्रियाको क्रममा यी मजदुरहरू आपसमा बङ्गाली भाषामा कुरा गरिरहेका थिए, जसको आधारमा ओडिशा पुलिसले तिनीहरूलाई विदेशी नागरिक ठानेर नियन्त्रणमा लियो। कोही वर्षौँदेखि फेरीको काम गर्दै आएका थिए भने कोही साना व्यापारीका रूपमा त्यहाँ बस्दै आएका थिए। स्थानीय परिचय भए तापनि शंका भएकै कारण उनीहरूलाई रोकिएको बताइन्छ। यस घटनापछि उनीहरूको परिवार निकै चिन्तित छ।
पूर्व मेदिनीपुरका जिलाधिकारी युनिस ऋषिन इस्माइलले भने, “हामी घटनाको छानबिन गरिरहेका छौँ। यदि उनीहरू हाम्रो जिल्लाका बासिन्दा भएको प्रमाणित भयो भने आवश्यक सहयोग प्रदान गरिनेछ।” नियन्त्रणमा परेका मजदुरहरूले भिडियो सन्देशमार्फत पश्चिम बङ्गालकी मुख्यमन्त्रीलाई उनीहरूलाई थानाबाट मुक्त गर्न र सुरक्षित घर फर्काउन सहयोग गर्न अपील गरेका छन्। घटनापछि पांशकुडा क्षेत्रमा असमन्जस, आक्रोश र चिन्ताको माहोल सिर्जना भएको छ।
---------------
हिन्दुस्थान समाचार / भवानी थामी
