नयाँ दिल्ली, २२ नोभेम्बर (हि.स.)। भारतीय रेलवेले माल ढुवानी क्षेत्रमा ऐतिहासिक उपलब्धि हासिल गर्दै वित्त वर्ष 2025-26 मा 1 बिलियन (1000 मिलियन टन) माल ढुवानीको आँकडा पार गरेको छ।

रेल मन्त्रालयका अनुसार, १९ नोभेम्बरसम्म रेलवेले कुल 1020 मिलियन टन (एमटी) माल ढुवानी गरिसकेको छ। यो उपलब्धि भारतीय अर्थतन्त्रको मजबूती तथा रेलवेको बढ्दो परिचालन दक्षताको प्रमाण मानिएको छ।

यस उपलब्धिमा प्रमुख औद्योगिक क्षेत्रहरूको महत्वपूर्ण योगदान छ। यसमा कोइला – 505 एमटी (सबैभन्दा बढी), फलाम अयस्क – 115 एमटी, सिमेन्ट – 92 एमटी, कन्टेनर ट्राफिक – 59 एमटी, पिग आयरन तथा तयार स्टिल – 47 एमटी, उर्वरक– 42 एमटी, खनिज तेल – 32 एमटी, खाद्यान्न – 30 एमटी, इस्पात उद्योगका कच्चा पदार्थ – 20 एमटी, अन्य वस्तुहरू – 74 एमटी सामेल छन्।

दैनिक माल लोडिङ पनि निरन्तर मजबूत देखिएको छ। यस वर्ष औसत 4.4 एमटी प्रतिदिन रह्यो जुन गत वर्षको 4.2 एमटी भन्दा बढी हो।

अप्रेलदेखि अक्टोबरबीच रेलवेको कुल माल ढुवानी 935.1 एमटी पुगेको छ, जुन गत वर्षको यही अवधिमा 906.9 एमटी थियो। यो वृद्धि भारतका उद्योग तथा पूर्वाधार क्षेत्रहरूमा बढ्दो माग पूरा गर्न रेलवेको भूमिका अझ महत्वपूर्ण बन्दै गएको सङ्केत हो।

सिमेन्ट क्षेत्रको महत्त्वलाई ध्यानमा राख्दै रेलवेले हालै धेरै सुधारात्मक कदमहरू चालेको छ। बल्क सिमेन्ट टर्मिनलहरूका लागि नयाँ नीति तथा कन्टेनरमार्फत बल्क सिमेन्ट ढुवानी दरहरूको तार्किक पुनरीक्षण त्यसमध्ये प्रमुख छन्। यी पहलहरूले सिमेन्ट ढुवानीलाई अझ आधुनिक, छरितो, किफायती तथा उच्च क्षमता सम्पन्न बनाउने लक्ष्य राख्छन्।

रेलमार्गबाट भारी माल ढुवानी बढ्दै जाँदा धेरै व्यापक फाइदा देखा परेका छन्, कार्बन उत्सर्जनमा कमी, सडकमा भीडभाडमा कमी, र विशेषगरी एमएसएमई उद्योगहरूलाई वातावरणमैत्री लजिस्टिक समाधान प्राप्त भएको छ। यी सबै कदमहरू भारतका नेट–जिरो कार्बन उत्सर्जन लक्ष्यका अनुरूप दीगो विकासलाई सुदृढ गर्दै, रेलवेलाई आर्थिक तथा पर्यावरणीय प्रगतिका प्रमुख माध्यमको रूपमा स्थापित गर्छन्।

---------------

हिन्दुस्थान समाचार / भवानी थामी