खरसाङ, 4 नोभेम्बर (हि.स.)। गोर्खाल्याण्ड क्षेत्रीय प्रशासनको प्रमुख कार्यपाल अनित थापाले आज टुंग सन्त मेरिज समष्टिको स्थलगत निरीक्षण भ्रमण गरे। उनले हालै वर्षाका कारण गएको पैह्रो प्रभावित क्षेत्रहरूको निरीक्षण गरे। यसावधि उनले सन्त मेरिज, ढडेन गाउँ, सेडी गाउँ, बेलटारका पैह्रो प्रभावित स्थानहरूमा पुगेर पुनर्निर्माण तथा रोकथामका कामलाई तीव्रता दिन सम्बन्धित अधिकारीहरूलाई निर्देशन पनि दिए।

भ्रमणका क्रममा जीटीए प्रमुख अनित थापाले क्याथोलिक सिस्टरहरूले सञ्चालन गर्दै आएको होली क्रस विद्यालयको भवन विस्तारको शिलान्यास पनि गरे। सो अवसरमा उनले शिक्षामा लगानी गर्नु भविष्य निर्माणका लागि आवश्यक रहेको बताउँदै भने, “जब कुनै समाजले मानव संसाधनको पर्याप्त भण्डार निर्माण गर्छ, तब त्यहाँ निर्माणशील र प्रगतिशील समाजको उदय हुन्छ।”

सभासद नुरी शेर्पा लगायत पञ्चायत सदस्यहरू, पार्टीका नेतृत्वहरू पनि भ्रमण समय साथमा रहेका थिए।

हिन्दुस्थान समाचार / हनोक