नयाँ दिल्ली, १८ दिसम्बर (हि.स.)। प्रधानमन्त्री नरेन्द्र मोदीले बिहिबार प्रख्यात मूर्तिकार राम सुतारको निधनप्रति गहिरो शोक व्यक्त गरेका छन्। उनले राम सुतारलाई एक असाधारण कलाकारको रूपमा स्मरण गर्दै उनको कलात्मक निपुणताले देशलाई स्ट्याच्यु अफ युनिटी सहित थुप्रै ऐतिहासिक स्मारकहरू प्रदान गरेको बताएका छन्।

प्रधानमन्त्रीले सामाजिक सञ्जाल प्लेटफर्म एक्समा पोस्ट गर्दै भने, राम सुतारका कृतिहरू भारतको इतिहास, संस्कृति र सामूहिक भावनाको सशक्त अभिव्यक्ति हुन्, जसलाई सधैं सराहना गरिनेछ। उहाँले भावी पुस्ताका लागि राष्ट्रिय गौरवलाई अमर बनाइदिनुभएको छ र उहाँका रचनाहरू कलाकार तथा आम नागरिक दुवैका लागि प्रेरणाको स्रोत रहनेछन्।

मोदीले राम सुतारको निधनले आफूलाई अत्यन्त दुःख पुगेको उल्लेख गर्दै भने, उहाँ एक अद्वितीय मूर्तिकार हुनुहुन्थ्यो, जसको कलात्मक प्रतिभाले भारतलाई केवडियामा अवस्थित स्ट्याच्यु अफ युनिटी सहित धेरै प्रतिष्ठित स्मारकहरू दिएको छ। उहाँका कृतिहरूलाई भारतको इतिहास, संस्कृति र सामूहिक चेतनाको सशक्त प्रतीकका रूपमा सधैं स्मरण गरिनेछ। उहाँले भावी पुस्ताका लागि राष्ट्रिय गौरवलाई अमर बनाइदिनुभएको छ। कला जगतमा राम सुतारको योगदान सधैं अविस्मरणीय रहनेछ।

प्रधानमन्त्रीले दिवंगत कलाकारका परिवार, प्रशंसकहरू तथा उनको जीवन र कार्यबाट प्रभावित सबैप्रति गहिरो समवेदना व्यक्त गरेका छन्।

स्ट्याच्यु अफ युनिटी का जनक मानिने प्रतिष्ठित मूर्तिकार राम सुतारको जन्म १९ फरवरी, १९२५ मा महाराष्ट्रको धुले जिल्लाको गोंडूर गाउँमा भएको थियो। उनले मुम्बईको जेजे स्कूल अफ आर्ट एन्ड आर्किटेक्चरबाट स्वर्ण पदक प्राप्त गरे। नयाँ दिल्लीको संसद परिसरमा स्थापित ध्यान मुद्रामा महात्मा गान्धीको मूर्ति तथा घोडामा सवार छत्रपति शिवाजी महाराजको मूर्ति उहाँका उत्कृष्ट कृतिहरूमध्ये पर्दछन्।

राम सुतारलाई सन् १९९९ मा पद्मश्री र २०१६ मा पद्म भूषणबाट सम्मानित गरिएको थियो। हालै उनलाई महाराष्ट्रको सर्वोच्च सम्मान महाराष्ट्र भूषणले पनि अलंकृत गरिएको थियो। गुजरातको केवडियामा नर्मदा नदी किनारमा स्थापित स्ट्याच्यु अफ युनिटी भारतका प्रथम उपप्रधानमन्त्री तथा गृहमन्त्री सरदार वल्लभभाई पटेललाई समर्पित छ। यो विश्वकै सबैभन्दा अग्लो प्रतिमा हो, जसको उचाइ १८२ मिटर छ। यो भारतको एकताको प्रतीक हो।

---------------

हिन्दुस्थान समाचार / भवानी थामी