कोलकाता, 24 दिसम्बर (हि.स.)। बंगलादेशकी निर्वासित लेखिका तथा मानवअधिकार कार्यकर्ता तसलीमा नसरीनले बंगलादेशको मयमनसिंहमा हिन्दू युवक दिपु चन्द्र दासको नृशंस हत्याको कडा निन्दा गर्दै पुन: एक पटक ईशनिन्दा कानून खारेज गर्न माग गरेकी छिन्। उनले ईशनिन्दाको नाममा भइरहेको हिंसालाई जायज ठहराउन यी कानूनहरूको खुलेआम दुरुपयोग भइरहेको र अब समाजले यसलाई अपराधको श्रेणीबाट हटाउनुपर्ने समय आएको बताएकी छिन्।
आफ्नो सामाजिक सञ्जालमा प्रतिक्रिया दिँदै तसलीमा नसरीनले भनिन्, ईशनिन्दाको आरोपमा अहिलेसम्म धेरै मानिसहरूलाई भीडले कुटपिट गरी हत्या गरेको वा जिउँदै जलाएको छ। अब यो कुरा स्पष्ट रूपमा स्वीकार गर्नुपर्छ कि ईशनिन्दा कुनै अपराध होइन, बरु यसको नाममा हिंसा गर्नेहरू नै वास्तविक अपराधी हुन् र उनीहरूलाई कडा सजाय हुनुपर्छ।
बारम्बार भइरहेका भीड हिंसाका घटनाहरूको उल्लेख गर्दै नसरीनले भनिन्, केवल आरोपकै भरमा मानिसहरूको ज्यान लिइँदैछ। उनले धार्मिक कट्टरताको बढ्दो खतरा, ईशनिन्दा प्रावधानहरूको दुरुपयोग र बंगलादेशमा धर्मनिरपेक्ष आवाज तथा अल्पसंख्यकहरूमाथि मडारिएको गम्भीर संकटलाई रेखांकित गरिन्।
उनले भनिन्, एक सभ्य देशमा ईशनिन्दा अपराध हुन सक्दैन। यस्तो हिंसा अन्त्य गर्नका लागि निर्दोषको हत्या गर्नेहरूलाई दण्डित गर्ने कानूनको आवश्यकता छ, न कि भीडलाई उक्साउने माध्यम बन्ने कानूनको।
तसलीमा नसरीनले दिपु चन्द्र दासको हत्यालाई एउटा षड्यन्त्र भन्दै एक सामान्य विवादपछि सहकर्मीले लगाएको झूटो आरोपले हिंसाको रूप लिएको बताइन्। उनले प्रश्न उठाइन् कि जब दिपु पुलिसको संरक्षणमा थिए, तब भीडले उनलाई कसरी आफ्नो कब्जामा लिन सफल भयो? उनले यस मामिलामा पुलिसको भूमिकामाथि पनि गम्भीर प्रश्न उठाउँदै निष्क्रियता वा मिलेमतोको आशंका व्यक्त गरिन्।
उनका अनुसार, दिपु पूर्ण रूपमा निर्दोष थिए र एउटा आरोपले मात्र हिंसालाई जन्मायो। बंगलादेशमा अल्पसंख्यकहरूको अवस्था अत्यन्त असुरक्षित रहेको बताउँदै उनले भनिन्, गरिब मानिसहरूसँग न देश बचेको छ, न सुरक्षा, न त कतै शरण लिने विकल्प नै। दिपु आफ्नो परिवारको एकमात्र सहारा थिए र उनका परिवारसँग भारत भाग्नका लागि समेत साधन थिएन।
तसलीमा नसरीनले पुन: आरोप लगाइन्, विभिन्न सरकारहरूले राजनीतिक फाइदाका लागि धर्मको प्रयोग गरिरहेका छन् र अल्पसंख्यकहरूविरुद्ध हिंसा गर्नेहरूलाई सजाय दिलाउन लगातार असफल भइरहेका छन्।
हिन्दुस्थान समाचार / भवानी थामी
