कोलकाता, २४ दिसम्बर (हि.स.)।
बंगलादेशमा हिन्दू समुदायका एक युवकको हत्या भएको घटनाको विरोधमा बुधबार पश्चिम बंगालमा भारत–बंगलादेश सीमा जोडिएका विभिन्न ल्यान्ड पोर्टहरूमा व्यापक प्रदर्शन भएका छन्। हिन्दू संगठनहरू तथा भारतीय जनता पार्टी (भाजपा) का कार्यकर्ताहरूले घटनाप्रति आक्रोश व्यक्त गर्दै सडकमा उत्रिएर विरोध जनाए।
हावडा जिल्लामा स्थिति त्यसबेला तनावपूर्ण बन्यो जब पुलिसले भाजपा नेतृत्वको जुलुसलाई हावडा ब्रिजतर्फ अघि बढ्नबाट रोकेको थियो। त्यसपछि प्रदर्शनकारी र पुलिसबीच चर्को बहस भयो, जुन पछि झडपमा परिणत भयो। पुलिसका अनुसार, सर्वसाधारणको आवागमन र यातायात व्यवस्था प्रभावित नहोस् भन्ने उद्देश्यले जुलुस रोकिएको हो।
हावडा पुलिसका एक वरिष्ठ अधिकारीले भने, “विरोधको नाममा कसैलाई पनि सार्वजनिक जीवन अवरुद्ध गर्न दिइने छैन। कानून व्यवस्था बिगार्ने कुनै पनि प्रयासमाथि कडाइका साथ कारबाही गरिनेछ।” पुलिसले रोकेपछि प्रदर्शनकारीहरू सडकमै बसेर धरना दिन थाले र बेरिकेड तोड्ने प्रयास गरे, जसले गर्दा अवस्था थप बिग्रियो। पुलिसको आरोप अनुसार, प्रदर्शनकारीहरू आक्रामक बनेपछि भीड नियन्त्रणका लागि आवश्यक कारबाही गर्नुपरेको थियो।
उत्तर २४ परगना जिल्लाका पेट्रापोल र घोजाडांगा ल्यान्ड पोर्ट, मालदाको मनोहरपुर मुचिया तथा कूचबिहारको चांग्राबांधा ल्यान्ड पोर्टमा सनातनी ऐक्य परिषदका सदस्यहरूले प्रदर्शन गरे। उनीहरूले बंगलादेशमा हिन्दूमाथि भइरहेका अत्याचारको विरोध गर्दै कडा नाराबाजी गरे।
उत्तर २४ परगनामा भाजपा विधायक अशोक कीर्तनियाको नेतृत्वमा जयन्तीपुर बजारदेखि पेट्रापोल सीमातर्फ जुलुस निकालियो। सीमा क्षेत्रको जिरो प्वाइन्ट नजिक सीमा सुरक्षा बलले बेरिकेड लगाएर जुलुसलाई अघि बढ्नबाट रोकेको थियो। यस क्रममा प्रदर्शनकारीहरूले नाराबाजी गर्दै बंगलादेशमा मोहम्मद युनुसको नेतृत्वमा रहेको प्रशासनिक व्यवस्थाप्रति तीव्र रोष व्यक्त गरे।
अशोक कीर्तनियाले भने, “जबसम्म बंगलादेशमा अल्पसंख्यकहरूको सुरक्षा र अधिकार सुनिश्चित हुँदैन, तबसम्म सीमा व्यापार निलम्बन गरिनुपर्छ, ताकि त्यहाँको सरकारलाई कडा सन्देश जाओस्।”
यस्तै किसिमका विरोध प्रदर्शन घोजाडांगा ल्यान्ड पोर्टमा पनि देखिए।
तर पेट्रापोल क्लियरिङ एजेन्ट्स एसोसिएसनका सदस्य कार्तिक चक्रवर्तीले भने, प्रदर्शनहरू सडकसम्म सीमित रहेकाले र बीएसएफको कडा निगरानीका कारण सीमा व्यापार प्रभावित नभएको जानकारी दिए।
मालदाको मनोहरपुर सीमा क्षेत्रमा हिन्दू समुदायका मानिसहरूले परम्परागत वाद्ययन्त्र खोल र करताल बजाउँदै प्रतीकात्मक प्रदर्शन गरे। प्रदर्शनकारीहरूले विरोधका क्रममा पश्चिम बंगाल पुलिसले बल प्रयोग गरेको र महिला तथा पुरुषहरूमाथि दुर्व्यवहार गरेको आरोप लगाएका छन्।
उल्लेखनीय छ, गत १८ दिसम्बरमा बंगलादेशको मयमनसिंह जिल्लाको बालुका क्षेत्रमा कथित ईशनिन्दाको आरोपमा २५ वर्षीय रेडिमेड गार्मेन्ट्स कारखानाका कर्मचारी दीपु चन्द्र दासलाई भीडले कुटपिट गरी हत्या गरेको थियो र पछि उनको शव जलाइएको थियो। यस घटनापछि कोलकाता सहित पश्चिम बंगालका विभिन्न जिल्लाहरूमा हिन्दू समुदाय र भाजपा लगातार विरोध प्रदर्शन गर्दै आएका छन्।
यसअघि मंगलबार पनि सयौँ प्रदर्शनकारीहरूले कोलकातास्थित बंगलादेशको उप–उच्चायोगतर्फ मार्च गर्ने प्रयास गरेका थिए, तर पुलिसले उनीहरूलाई बेकबागान क्षेत्रमा रोक्दा झडप भएको थियो, जसमा धेरै जना घाइते भएका थिए।
---------------
हिन्दुस्थान समाचार / भवानी थामी
