– अहिलेसम्म राज्यमा ५७० अवैध मजार हटाइयो

देहरादून, 27 दिसम्बर (हि.स.)। धामी सरकारले अवैध अतिक्रमणविरुद्ध सञ्चालन गरिरहेको अभियान निरन्तर जारी छ। यसअन्तर्गत प्रशासनले देहरादून र उधमसिंह नगर जिल्लाको गदरपुरमा बनेका एक–एक अवैध मजारका संरचनाहरू ध्वस्त गरेको छ। प्रशासनका अनुसार, सार्वजनिक भूमिबाट अतिक्रमण हटाउने क्रममा यो कदम चालिएको हो। कारबाही अघि सम्बन्धित स्थलमा नोटिस प्रक्रियासमेत पूरा गरिएको थियो। धामी सरकारको कार्यकालमा अहिलेसम्म राज्यभर ५७० अवैध मजार हटाइसकिएको छ।

मुख्यमन्त्री पुष्कर सिंह धामीले उत्तराखण्डमा सरकारी भूमि कब्जा गर्ने खेल अब चल्न नदिइने स्पष्ट गर्दै सरकारी जमिनमा भएको अतिक्रमण पूर्ण रूपमा अन्त्य गरिने बताएका छन्।

उधमसिंह नगरका एडीएम पंकज उपाध्यायका अनुसार, जिल्ला अधिकारी नितिन भदौरियाको निर्देशनअनुसार एसडीएम ऋचा सिंहले सरकारी बगैंचामा बनेको अवैध संरचना हटाउन नोटिस जारी गर्ने प्रक्रिया पूरा गरेकी थिइन्। सरकारी उद्यानका अधिकारीहरूले पनि उक्त संरचना हटाउन जिल्ला प्रशासनलाई पत्र दिएका थिए। दुई हप्ताको समय दिए पनि कसैले नोटिसको जवाफ नदिएपछि शनिबार बिहान सबेरै उक्त अवैध संरचना हटाइएको हो।

उत्तराखण्डमा धामी सरकारले अहिलेसम्म ५७० यस्ता अवैध मजार हटाइसकेको छ। यसै क्रममा गत रात देहरादूनको हरिद्वार रोडस्थित एक अवैध मजारलाई दून प्रशासनले ध्वस्त गरेको थियो।

प्राप्त जानकारीअनुसार, देहरादून नगर मजिस्ट्रेट प्रत्यूष सिंह र एसडीएम हरि गिरीको नेतृत्वमा नगर निगमको टोलीले हरिद्वार रोडस्थित कैलाश अस्पताल अगाडिको गल्लीमा सडकको बीचमा बनेको अवैध मजारलाई शुक्रबार जेसीबी मेसिन प्रयोग गरी ध्वस्त गरेको हो। त्यसपछि मलबा हटाएर स्थल सफा गरिएको थियो। प्रशासनका अनुसार, संरचनामुनि कुनै प्रकारका मानव अवशेष फेला परेका छैनन्।

प्रशासनिक अधिकारीहरूले बताएअनुसार, अवैध संरचना हटाउनुअघि स्थलमा नोटिस टाँसिएको थियो। सार्वजनिक मार्गमा अवरोध बनेको संरचना हटाउन र तोकिएको समयभित्र कुनै जवाफ नआएपछि नियमअनुसार यो कारबाही गरिएको हो।

उल्लेखनीय छ, उक्त अवैध संरचनाबारे पहिले नै विभिन्न सङ्गठनहरूले प्रशासनलाई ज्ञापनपत्र बुझाउँदै यसले यातायातमा बाधा पुर्‍याएको बताएका थिए। यसअघि त्यहाँ राखिएको टिनको शेड प्रशासनले पहिले नै हटाइसकेको थियो।

हिन्दुस्थान समाचार / भवानी थामी