गेजिङ, 28 दिसम्बर (हि.स.)। गेजिङ जिल्लास्थित पेलिङ मैदानमा चलिरहेको कञ्चनजोङ्गा शीतकालीन पर्यटन महोत्सव २०२५ ले चौथो दिनमा प्रवेश गरेको छ। महोत्सवमा आज स्थानीय बासिन्दा तथा पर्यटकहरूको उत्साहजनक सहभागिता देखियो। साताव्यापी यस महोत्सवले क्षेत्रभरि उत्सवको माहोल सिर्जना गरेको छ।

गेजिङ जिल्ला प्रशासनको सहयोगमा पेलिङ टुरिज्म डेभलपमेन्ट एसोसिएसन, १४ सिङयाङ–चुम्बुङ जीपीयू तथा ब्लु रिङ्स सोसाइटी, पेलिङको संयुक्त आयोजनामा सञ्चालन भइरहेको यस महोत्सवको चौथो दिनमा सिक्किम स्टेट होटल एण्ड होमस्टे डेभलपमेन्ट एसोसिएशनका अध्यक्ष जिग्मी दोर्जी भोटिया प्रमुख अतिथिका रूपमा उपस्थित थिए।

महोत्सवले पेलिङ क्षेत्रको समृद्ध सांस्कृतिक सम्पदा, परम्परागत कला, मौलिक परिकार तथा जीवन्त सामुदायिक सहभागितालाई प्रवर्द्धन गर्दै पेलिङको वास्तविक आत्मा झल्काइरहेको छ। यस महोत्सवले पर्यटन प्रवर्द्धनका लागि स्थानीय सरोकारवालालाई अवसर प्रदान गर्नुका साथै स्थानीय कलाकार, शिल्पी तथा स्वयं सहायता समूह (एसएचजी) हरूलाई आफ्ना कला तथा सीप प्रदर्शन गर्ने महत्वपूर्ण मञ्चसमेत उपलब्ध गराएको छ।

चौथो दिनको कार्यक्रमअन्तर्गत आकर्षक सांस्कृतिक नृत्य प्रस्तुतिहरू प्रदर्शन गरिए। साथै स्थानीय हस्तकला, जैविक उत्पादन, जातीय परिकारका स्टलहरू स्थापना गरिएका थिए। यसैगरी, फुटसल प्रतियोगिता पनि आयोजना गरियो, जुन आकर्षणको केन्द्र बन्यो।

प्रमुख अतिथि तथा विशिष्ट अतिथिहरूले स्टलहरूको अवलोकन गर्दै पेलिङदेखि याम्बुङसम्म आयोजना गरिएको ‘ग्राटिट्युड रन’ लाई झण्डा देखाएर शुभारम्भ गरे। यो दौड ‘सिक्किमका म्याराथन म्यान’ अमर सुब्बाको नेतृत्वमा सम्पन्न भयो, जसमा तीन जना धावकहरूले सहभागिता जनाए।

हिन्दुस्थान समाचार / बिशाल