गान्तोक, 21 अगस्त (हि.स.)। ३४औँ नेपाली भाषा मान्यता दिवसको अवसरमा भालेढुङ्गा साहित्यिक मञ्च, याङगाङको तत्वावधानमा पीएम श्री याङयाङ वरिष्ठ माध्यमिक विद्यालयमा भव्य कार्यक्रमको आयोजना गरियो। कार्यक्रममा मुख्य अतिथि एसआर सुब्बा (खजुम) उपस्थित थिए भने कार्यक्रमको सभाध्यक्षता 15 राङगाङ-याङगाङ निर्वाचन क्षेत्रकी विधायक तथा सिक्किम विधानसभा उपसभामुख राजकुमारी थापाले गरिन्।
कार्यक्रममा विविध साहित्यिक, सांस्कृतिक र नाट्य प्रस्तुतिहरू समावेश गरिएको थियो। यसका साथै प्रमुख कार्यक्रमको रूपमा परिचर्चा एवं विमर्श कार्यक्रम पनि समावेश गरिएको थियो।
परिचर्चामा विशिष्ट वक्ताको रूपमा सिक्किम विश्वविद्यालयकी अवकाश प्राप्त प्राध्यापक डा. पुष्पा शर्मा, नर बहादुर भण्डारी डिग्री कलेजका सहायक प्राध्यापक डा. टीबी छेत्री, केन्द्रिय विश्वविद्यालय सिक्किम, याङगाङका नेपाली विभागका सहायक - प्राध्यापक डा. बलराम पाण्डेको उपस्थिति रहेको थियो भने सञ्चालकको रूपमा पत्रकार एवं युवा कवि एनबी घिमिरे उपस्थित थिए।
सोही अवसरमा मुख्य अतिथिद्वारा भालेढुङ्गा साहित्यिक मञ्चको सामयिक पत्रिका “भालेढुङ्गा देखि हेर्दा” को दोस्रो संस्करण लोकार्पण गरियो। कार्यक्रममा मुख्य अतिथि एसआर सुब्बा र भालेढुङ्गा साहित्यिक मञ्चका पूर्व अध्यक्ष गोपीदास पोख्रेललाई सम्मानित गरिएको थियो। कार्यक्रममा विभिन्न सरोकारवालाहरुलाई स्मृतिचिन्ह समेत प्रदान गरियो।
कार्यक्रमकी अध्यक्ष विधायक राजकुमारी थापाले आफ्नो सम्बोधनमा विद्यालय स्तरमै नेपाली भाषाको प्रयोग र प्रवर्द्धनलाई प्राथमिकतामा राख्नुपर्ने कुरामा जोड दिइन्। उनले विद्यालयस्तरमा आगामी दिनमा प्यानल छलफल कार्यक्रमसमेत आयोजना गर्न सुझाउ दिइन्।
नेपाली भाषाको संरक्षण र प्रवर्द्धनमा अझै दृढ प्रतिबद्धता जाहेर गर्दै सफलतापूर्वक सम्पन्न भएको यस कार्यक्रममा सिक्किम सरकारका खाद्य प्रशोधन एकाइका सल्लाहकार सीएल गुरुङ, 15-राङगाङ-याङगाङ निर्वाचन क्षेत्रविधायककी विशेष कार्य अधिकारी डेङ्किला भोटिया, याङगाङ महकुमा कार्यालयका महकुमा अधिकारी केएल दहाल, खण्ड विकास अधिकारी निडे भोटिया, भालेडुङ्गा साहित्यिक मञ्चका प्रमुख सल्लाहकार बीबी सुब्बा इजम, शिक्षा विभाग मुख्यालयका अतिरिक्त निर्देशक एडी छेत्री, भालेढुङ्गा साहित्यिक मञ्चका अध्यक्ष पिएल दङ्गाल, मञ्चका पूर्व अध्यक्ष गोपी दास पोख्रेल, मञ्चका महासचिव आरएस भण्डारी साथै विभिन्न विद्यालय, कार्यालय, साहित्यिक संस्था तथा गैर–सरकारी संस्थाका प्रतिष्ठित व्यक्तिहरू लगायत अन्य धेरै भाषाप्रेमी महानुभावको बाक्लो उपस्थिति रहेको प्रेस विज्ञप्तिमा तमा उल्लेख छ।
हिन्दुस्थान समाचार / बिशाल
