खरसाङ, 21 अगस्त (हि.स.)। गोर्खाल्याण्ड क्षेत्रीय प्रशासनको सूचना अनि सांस्कृतिक विभाग र नेपाली भाषा मान्यता दिवस समारोह समितिको आयोजनामा जीटीए क्षेत्रभरि आयोजना गरिएको दुई सप्ताहव्यापी नेपाली भाषा मान्यता दिवस समारोह अन्तर्गत आज खरसाङमा विराट जुलुसको साथमा पालन गरिएको छ। उक्त ऱ्यालीलाई 'विराट जागरण जुलुस' को नाम दिइएको थियो।
भाषा हाम्रो प्राण हो भन्ने नाराका साथ उक्त विराट जागरण जुलुस खरसाङ मोटर स्ट्याण्डबाट शुरु भएर हिल कार्ट रोड हुँदै अस्पताल मोडबाट वर्द्धमान रोड भएर पुनः मोटर स्ट्याण्ड हुँदै नयाँ बजारस्थित टाउन सार्वजनिक भवनमा पुगेर कार्यक्रममा परिणत भयो। नेपाली भाषालाई लिएर आयोजित विराट जागरण जुलुसमा विभिन्न संघ संस्थाहरुका प्रतिनिधिहरु, विभिन्न विद्यालयहरुको विद्यार्थीहरुले सहभागिता जनाएका थिए।
विराट जागरण जुलुसमा सहभागीहरुले 'भाषा हाम्रो प्राण हो, भाषा बाँचे जाति बाँच्छ, नेपाली भाषा हाम्रो मातृ भाषा हो, नेपाली भाषालाई सम्मान गरौं, नेपाली भाषा शुद्ध लेखौं, सूचनापटहरु नेपालीमा लेखौं, बाटो र ठाउँको नाम नेपालीमा लेखौं, कार्यालयतिर आवेदन नेपाली भाषामा लेखौँ' जस्ता नाराहरु लगाएका थिए।
हिन्दुस्थान समाचार / हनोक
