खरसाङ, 21 अगस्त (हि.स.)। नेपाली भाषालाई भारतीय संविधानको आठौँ अनुसूचीमा समावेश गरिएको दिनलाई स्मरण गर्दै नेपाली भाषा दिवस पालन समितिको तत्वावधानमा एक समारोह आयोजन गरियो। उक्त समारोह सालबारी, मेथीबारी, सुकना, दागापुर र पत्थरघट्टा वरिपरिका ४० वटा भन्दा बढी संघ-संस्था र समाजहरूको सहयोग तथा सहभागितामा ३४औँ नेपाली भाषा मान्यता दिवस साहित्य शिखर पद्मश्री सानु लामा मञ्चको ब्यानरमा आयोजन गरियो।
बिहान विभिन्न संघ-संस्थाका सदस्य/सदस्याहरु, भाषाप्रेमी र विद्यार्थीहरु प्राय: एक हजारभन्दा बढी संख्यामा भेला भई रङ्गीन शोभायात्रा निकालेका थिए। उक्त शोभायात्रा नौमती बाजाको तालमा नाचगान गर्दै राष्ट्रिय राजमार्ग, एसआईटी मोडबाट सालबारी क्षेत्र परिक्रमा गरी कार्यक्रम स्थल रहेको मैदानमा प्रवेश गरेको थियो भने दिउँसो सांस्कृतिक कार्यक्रमको आयोजना गरिएको थियो।
उक्त कार्यक्रम महेन्द्र थापा र बविता मादेनले सञ्चालन गरेका थिए भने भाषा दिवस समितिका सदस्य अनुप छेत्रीले स्वागत भाषण राखेका थिए। विभिन्न सहयोगी संघ संस्थाका नानीहरू लगायत गण्यमान्य कलाकारहरूले गीत- नृत्य, कविता वाचन र नाटक प्रदर्शन गरी सबै दर्शकवृन्दलाई मन्त्रमुग्ध गराएका थिए। उक्त कार्यक्रममा लीलबहादुर सुनारले अध्यक्षता गरेका थिए भने प्रमुख अतिथि, उत्तर बंगाल विश्वविद्यालयका नेपाली विभागका प्राध्यापक डाक्टर सञ्जय बान्तवा रहेका थिए।
उक्त कार्यक्रममा मुख्य वक्ताको रूपमा वरिष्ठ कवि, अध्येता ज्ञानेन्द्र खतिवडा लगायत वरिष्ठ साहित्यकार जस योञ्जन 'प्यासी' थिए। कार्यक्रममा विशेष मन्तव्य वरिष्ठ साहित्यकार जस योञ्जन प्यासी लगायत ललित गोले उर्फ पालाले राखेका थिए भने भाषा सम्बन्धित अन्य रोचक जानकारी डाक्टर सञ्जय बान्तवा लगायत वरिष्ठ कवि ज्ञानेन्द्र खतिवडाले आफ्नो वक्तव्यमा राखेका थिए।
यस अवसरमा भाषा दिवस समितिका संयोजक समीर ब्लोनले सालबारी, मेथीबारी, पत्थरघट्टा लगायत वरिपरिका संघ-संस्थालाई सङ्गठित पार्नमा महत्वपूर्ण भूमिका बहन गरेको बताइएको छ। यस अवसरमा भाषा समितिको प्रयासमा संकलन गरिएको मायाको चिनो स्वरूप स्मृति चिन्ह सांस्कृतिक कार्यक्रममा अंशग्रहण गर्ने विविध विधाका कलाकार, कवि साथै सहयोगी संघ-संस्था लगायत आर्थिक सहयोग पुर्याउने दाताहरूलाई भाषा दिवस समितिका अध्यक्ष लीलबहादुर सोनार, सचिव बीएस राना लगायत अन्य विशिष्ट अतिथिगणका बाहुलीबाट प्रदान गरेका थिए।
यसै कार्यक्रममा तीन मेधावी छात्र-छात्रालाई, उनीहरूले नेपाली विषयमा 90 भन्दा बढी अङ्क प्राप्त गरेकोमा खादार्पण गरी विशेष सम्मानद्वारा मायाको चिनो स्वरूप स्मृति चिह्न प्रदान गरेका थिए। कार्यक्रममा साहित्य अकादमी पुरस्कार प्रापक साहित्यकार, वरिष्ठ कवि, कथाकार, भाषाविज्ञ, विविध विधाका बुद्धिजीवि, विशिष्ट समाजकर्मी, सांस्कृतिक कर्मी लगायत भाषाप्रेमी आदिको विशेष उपस्थिति रहेको थियो।
अन्त्यमा नेपाली भाषा दिवसका सभापति लीलबहादुर सुनारले सम्पूर्ण सहभागी संघ-संस्था लगायत अतिथिगण प्रति आभार व्यक्त गर्दै सभापतित्व भाषण राखेका थिए भने सचिव बीएस रानाद्वारा धन्यवाद ज्ञापनपछि अध्यक्षद्वारा सांस्कृतिक कार्यक्रम समाप्तिको घोषणा गरेको डाक्टर हेमन्त काफ्लेले जानकारी गराएका छन्।
हिन्दुस्थान समाचार / हनोक
