गान्तोक, 21 अगस्त (हि.स.)। पर्यावरणबारे जागरूकता, मानसिक स्वास्थ्य तथा शारीरिक स्वास्थ्य प्रोत्साहित गर्ने दिशामा जारी पहलको अंशका रूपमा केन्द्रिय सञ्चार ब्यूरो (सीबीसी), भारत सरकार तथा पत्र सूचना कार्यालय (पीआईबी), गान्तोकद्वारा पाकिम जिल्ला अन्तर्गत आहोपुल किसान सरकारी उच्चतर स्कूलमा विशेष लोकसम्पर्क कार्यक्रम आयोजित गरियो। कार्यक्रम विकसित भारत@2047 विषयमा आयोजित र “एक पेड माँ के नाम” र नशामुक्त भारत जस्ता प्रमुख पहलमाथि केन्द्रित थियो। उक्त जानकारी पीआईबीले दिएको छ।

कार्यक्रम यी विषयहरूमा स्थानीय समुदायलाई संलग्न गराउनका साथै जागरूकता बढाउन लक्षित थियो। यस अवसरमा आकाशवाणी गान्तोककी अवकाशप्राप्त वरिष्ठ समाचार वाचिका एवं अनुवादक ऊषा शर्मा अनि स्कूलका प्रधान अध्यापक डाण्डी शेर्पा विशेष अतिथिका रूपमा उपस्थित थिए।

कार्यक्रममा स्कूलका सङ्काय सदस्य अनि कर्मचारीहरूका साथमा पीआईबी गान्तोक अनि आकाशवाणी गान्तोकका अधिकारीहरू पनि उपस्थित थिए। कार्यक्रममा नवौं अनि दसौं श्रेणीका विद्यार्थीहरूले उत्साहका साथ भाग लिए।

पीआईबी गान्तोकका सूचना सहायक मैनाक च्याटर्जीले स्वागत सम्बोधन पेश गर्दै कार्यक्रमको विषयवस्तुबारे जानकारी दिनका साथै समुदायमा लोकसम्पर्क कार्यक्रमको महत्त्वबारे अवगत गराए। उनले अतिथि अनि प्रतिभागीहरूप्रति आभार व्यक्त गरे।

स्कूलका प्रधान अध्यापक डाण्डी शेर्पाले जागरूकता कार्यक्रम आयोजित गरिदिएकोमा आभार व्यक्त गर्दै विद्यार्थीहरूको हितका लागि विविध विषयमा यस प्रकारका पहलको आवश्यकतामाथि जोड दिए। यस प्रकारको सूचनामूलक जागरूकता कार्यक्रमको दुवै समाज अनि विद्यार्थीहरूमा व्यापक असर पर्ने उनले बताए।

कार्यक्रममा विद्यार्थीहरूबीच लोकसम्पर्क कार्यक्रमको विषयमा आधारित ऊषा शर्माको सञ्चालनमा हाजिरी जवाफ प्रतियोगिता आयोजित गरिएको थियो। विद्यार्थीहरूले सक्रिय रूपमा भाग लिँदै कार्यक्रमलाई सूचनामूलक अनि रोचक बनाए। सही उत्तर दिने विद्यार्थीहरूलाई पुरस्कार पनि प्रदान गरियो।

कार्यक्रमको मुख्य विशेषता नवौं श्रेणीका विद्यार्थी मिल्का तामाङद्वारा प्रस्तुत वक्तव्य रहेको थियो। कार्यक्रम आयोजित गरेवापत् उनले पीआइबी र सीबीसीप्रति आभार व्यक्त गर्दै सञ्चार माध्यमबारे बहुमूल्य कुरा सिक्न सकेको उनले बताइन्। उनको वक्तव्यले विद्यार्थीहरूमा कार्यक्रमको सकारात्मक प्रभाव प्रदर्शित भएको थियो।

कार्यक्रमको समापन आहोपुल किसान सरकारी उच्चतर स्कूलका विज्ञान विषयका स्नातक शिक्षक दिनेशकुमार विष्टको धन्यवाद ज्ञापनसँगै भएको थियो।

हिन्दुस्थान समाचार / बिशाल