हुगली, 21 अगस्त (हि. स.)। चन्दननगरमा बुधवार बिहान एकजना ब्यांककर्मीको असामान्य मृत्युले कोकोहोलो मच्चिएको छ। मृतकको पहिचान सौमेन दे (39)-को रूपमा भएको छ जो चुञ्चुड़ा खादिना मोड़स्थित एक सरकारी ब्यांकको शाखामा क्लर्कको पदमा कार्यरत थिए।

पुलिस सूत्र अनुसार सौमेन बिहान आफ्नी पत्नीसित खाजा खाएपछि घरमै थिए। उनकी पत्नी कुनै कामले बाहिर गएकी थिइन्।केही समयपछि अचानक आवासर परिसरमा भयानक आवाज सुनेर छिमेकीहरू घटनास्थलमा पुगेर हेरे जहाँ सौमेनको शव भुइँमा लड़िरहेको थियो। पुलिसले उनलाई चन्दन नगर अस्पतालमा पुऱ्याए जहाँ डाक्टरहरूले मृत घोषित गरिदिए।

प्रारम्भिक आशंकामा सौमेनले आठौं तलाको फ्ल्याटको बालकनीबाट हाम फालेर आत्महत्या गरे। दोस्रो विवाहपछि सौमेन आफ्नी पत्नीसित चन्दननगर रथेर रोडस्थित एक बहुतले आवासमा बस्दै आएका थिए। उनको पैतृक घर चन्दननगरको वैद्यपोता क्षेत्रमा छ।

पारिवारिक सूत्र अनुसार पहिलो पत्नीसित सम्बन्ध विच्छेद भएको लगभग दुई वर्षपछि तिनले दोस्रो विवाह गरेका थिए। दोस्रो विवाहपछि नै तिनले फ्ल्याट खरिद गरेका थिए।

घटनाको सूचना पाए लगत्तै स्थानीय माकपा पार्षद अशोक गांगुली पनि घटनास्थलमा पुगे। उनले भने, प्रारम्भिक जानकारी अनुसार सौमेनले फ्ल्याटको उत्तरी भागको लबीबाट हाम फाले।

मृतकका आफन्त शोभन शिलले बताए, परिवारलाई पहिला “दुर्घटना”-भएको खबर दिइएको थियो। पछि अस्पतालमा पुगेपछि थाहा लाग्यो, सौमेन माथिदेखि झरेका थिए। पुलिसले शवलाई पोस्टमर्टम गर्नको लागि पठाइदिएर घटनाको जाँच शुरू गरेको छ।

हिन्दुस्थान समाचार / उष्णता छेत्री शर्मा