गान्तोक, 21 अगस्त (हि.स.)। राज्य स्वास्थ्य एवं परिवार कल्याण विभागले आज टाशीलिङ परिसरबाट राष्ट्रिय स्वास्थ्य अभियान अन्तर्गत 102/108 एम्बुलेन्स सेवाहरूको विस्तारको आधिकारिक रूपमा शुभारम्भ गऱ्यो। मुख्यमन्त्री प्रेमसिंह तामाङले विभागीय मन्त्री जीटी ढुङ्गेलको उपस्थितिमा झण्डा हल्लाएर एम्बुलेन्स सेवाहरूको शुभारम्भ गरे।

यस अवसरमा स्वास्थ्य विभागका सचिव छेवाङ ग्याछो, विभागका प्रधान निदेशकहरू, एसटीएनएम अस्पतालकी चिकित्सा अधीक्षक लगायत अन्य अधिकारीहरू पनि उपस्थित थिए। राज्यमा आपतकालीन स्वास्थ्य सेवालाई सुदृढ पार्न यस सुविधाले प्रमुख भूमिका निर्वाह गर्ने विश्वास व्यक्त गरिएको छ।

102 र 108 एम्बुलेन्स सेवा कल सन्टर आधारित 24x7 आपतकालीन रेफरल यातायात सेवा हुन्। उक्त सेवा टोल फ्री नम्बर 102 र 108 मार्फत नि:शुल्क उपलब्ध छन्। 102 एम्बुलेन्स मुख्य रूपमा गर्भवती महिलाहरू र बिरामी नवजात शिशुहरू (एक वर्षसम्म) को लागि हो भने 108 एम्बुलेन्स आघात र आपतकालीन बिरामीहरूका लागि रहेको छ। सिक्किममा, दुवै सेवाहरूलाई अधिकतम उपयोगको लागि एउटै एम्बुलेन्स प्रणालीमा एकीकृत गरिएको छ।

यी एम्बुलेन्सहरू आधारभूत जीवन समर्थन, आवश्यक चिकित्सा उपकरण र जीवन-समर्थन किटहरूले सुसज्जित सवारी साधनहरू हुन्, जुन प्रशिक्षित चालकहरू र प्यारामेडिक्सद्वारा सञ्चालित छन्। उक्त सेवा सर्वप्रथम 2018 मा 8 वटा एम्बुलेन्सका साथ पश्चिम जिल्लामा शुरू गरिएको थियो। राज्य सरकारले स्वास्थ्य देखभाललाई उच्च प्राथमिकता दिॅंदै थप 9 वटा एम्बुलेन्स तैनाथ गरेको छ। यसमा गान्तोक जिल्लाको लागि एउटा, पाकिम जिल्लाको लागि दुईवटा र नाम्ची जिल्लाको लागि छवटा सामेल छन्।

102/108 एम्बुलेन्स सेवाको विस्तारले सिक्किमका जनताको लागि पहुँचयोग्य, समयमै र नि:शुल्क स्वास्थ्य सेवा सुनिश्चित गर्ने सरकारको दृढ प्रतिबद्धतालाई प्रतिबिम्बित गर्दछ भनी बताइएको छ।

हिन्दुस्थान समाचार / बिशाल