गान्तोक, 21 अगस्त (हि.स.)। राज्य वाणिज्य एवं उद्योग विभागको तत्वावधानमा आज राजधानीको चिन्तन भवनमा 'विश्व उद्यमी दिवस' पालन गरियो। यस अवसरमा 'हामी मिलेर निर्माण गर्छौं' थीममा आयोजित कार्यक्रममा मुख्यमन्त्री प्रेमसिंह तामाङ मुख्य अतिथि थिए।
कार्यक्रमलाई सम्बोधन गर्दै मुख्यमन्त्री तामाङले राज्यमा पहिलोपल्ट उद्यमी दिवस पालन गरिएको बताए। उद्यमशीलताका मुख्य पक्षहरूमाथि प्रकाश पार्दै उनले सफल बन्न आफ्ना अन्तर्दृष्टिहरू साझा गरे। उनले महत्वाकांक्षी उद्यमीहरूले सक्रिय रूपमा अवसरहरूको खोजी गर्नुपर्ने, व्यावहारिक अनुभव प्राप्त गर्नुपर्ने र दृढ संकल्प र लगनशीलताका साथ चुनौतीहरूको सामना गर्नुपर्ने कुरामा जोड दिए।
मुख्यमन्त्रीले उद्यमशीलतामा उपलब्ध विशाल अवसरहरूमा जोड दिॅंदै युवाहरूलाई यो क्षेत्रको अन्वेषण गर्न प्रोत्साहित गरे, जहाँ विकासको सम्भावनाले नवप्रवर्तन र आर्थिक प्रगतिलाई मात्र नभई आत्मनिर्भरता र दीर्घकालीन दिगोपनको लागि अवसर पनि प्रदान गर्दछ। उनले युवाहरूलाई यी अवसरहरूबाट फाइदा उठाउन तथा मन्त्रालय र राज्य सरकारले उपलब्ध गराएका विभिन्न पहलहरू, योजनाहरू र समर्थन प्राणलीबाट लाभ उठाउन प्रोत्साहित गरे। उनले सही दृष्टिकोण र दृढ संकल्पका साथ युवाहरू परिवर्तनको प्रमुख चालकको रूपमा देखा पर्न सक्ने र राज्यको विकास र समृद्धिमा महत्वपूर्ण योगदान पुर्याउन सक्ने बताए।
राज्य वाणिज्य एवं उद्योग विभाग मन्त्री टीटी भोटियाले मुख्यमन्त्रीलाई उनको सहयोगको लागि कृतज्ञता व्यक्त गरे र राज्यको विकासमा उद्यमीहरूको महत्वपूर्ण योगदानको सराहना गरे। कार्यक्रमले उद्यमीहरूको नवीन विचार र प्रयासहरूलाई सम्मान गर्ने उद्देश्य राखेको छ बताउॅंदै यसले आर्थिक प्रगति मात्र नभई महत्त्वपूर्ण रोजगारीका अवसरहरू पनि सिर्जना गर्ने उनले बताए।
उनले उदीयमा उद्यमीहरूलाई परिवर्तनका निर्माताको रूपमा वर्णन गर्दै समाजलाई उनीहरूको प्रतिभा र समर्पणलाई समर्थन गर्न आग्रह गरे। उनले मुख्यमन्त्रीको एक परिवार, एक उद्यमीको दृष्टिकोणलाई पनि जोड दिए र राज्यभर उद्यमशीलतालाई अझ प्रवर्द्धन गर्न विभागको पहलहरूको बारेमा जानकारी गराए
हिन्दुस्थान समाचार / बिशाल
