- सिक्किमको दृढता, विकास र ऐक्यबद्धताको कथाले भावी पुस्तालाई प्रेरित गर्ने मुख्यमन्त्रीको आशा

गान्तोक, 21 अगस्त (हि.स.)। टाइम क्याप्सुल 2025-75 लाई आज बिहान टाशीलिङ सचिवालय परिसरको रुस्तमजी डियर पार्कमा सिल गरेर 50 वर्षको लागि गाडिएको छ। 32 किलोग्रामको यो टाइम क्याप्सुललाई प्रतीकात्मक रूपमा 'भविष्यको लागि सन्देश' को रूपमा डिजाइन गरिएको छ।

राज्य सूचना तथा जनसम्पर्क विभागद्वारा सिक्किम राज्य स्थापनाको 50औं वर्षको उपलक्ष्यमा आयोजित यस ऐतिहासिक कार्यक्रममा मुख्यमन्त्री प्रेमसिंह तामाङले निर्दिष्ट स्थलमा क्याप्सुललाई अन्तिम सिल अनि दफन गर्ने प्रक्रिया पूरा गरे। यस अवसरमा सिक्किम विधानसभाका अध्यक्ष मिङ्मा एन शेर्पा, क्याबिनेट मन्त्रीहरू, विधायकहरू, जीएमसीका उपमेयर, सल्लाहकारहरू र अध्यक्षहरू, मुख्य सचिव आर. तेलाङ, डीजीपी अक्षय सचदेव तथा राज्य सरकारका वरिष्ठ अधिकारीहरूको उपस्थिति रहेको थियो।

यो टाइम क्याप्सुल 16 मई, 1975 का दिनसम्म सिल रहनेछ र सिक्किम राज्य स्थापनाको 100औं वार्षिकोत्सवको ऐतिहासिक अवसरमा खोलिनेछ।

कार्यक्रमलाई सम्बोधन गर्दै मुख्यमन्त्री तामाङले टाइम क्याप्सुल 2025-75 को सिलबन्दीलाई सिक्किमको इतिहासमा एक ऐतिहासिक क्षण बताए। उनले यस परियोजनाको अवधारणा र यसलाई कार्यरूपमा उतारेकोमा आईपीआर विभागको प्रशंसा गरे। विभागद्वारा क्याप्सुलमा राज्यको सांस्कृतिक सम्पदा, रीतिरिवाज र विकासात्मक उपलब्धिहरूलाई भावी पुस्ताका लागि सावधानीपूर्वक संरक्षित गरिएको बताउँदै मुख्यमन्त्रीले यसमा विभिन्न समुदाय, नागरिक, शैक्षिक संस्था र सरकारी निकायहरूको योगदानको पनि प्रशंसा गरे।

उनले 2075 मा यो क्याप्सुल खोल्दा सिक्किमको दृढता, विकास र ऐक्यबद्धताको कथाले भावी पुस्तालाई प्रेरित गर्नेछ भनी आशा व्यक्त गरे। मुख्यमन्त्रीको सम्बोधनपछि निर्दिष्ट स्थानमा टाइम क्याप्सुललाई औपचारिक रूपमा सिल गर्ने र गाड्ने काम सुरु गरियो।

यसअघि आफ्नो स्वागत सम्बोधनमा आईपीआर विभागकी सचिव अन्नपूर्णा आलेले टाइम क्याप्सुल परियोजनाको स्थापनादेखि कार्यान्वयनसम्मको यात्राको बारेमा जानकारी गराइन्। उनले यसलाई 2025 का भौतिक र डिजिटल सम्झनाहरू, गहनाहरू, अवशेषहरू, आवाज र दृष्टिकोणहरूको भण्डारले भरिएको भविष्यको लागि पत्र को रूपमा वर्णन गरिन्।

सचिव आलेले मुख्यमन्त्रीलाई आफ्नो व्यक्तिगत दृष्टिकोणद्वारा यस परियोजनालाई मार्गदर्शन गरेकोमा धन्यवाद दिइन्। उनले मुख्यमन्त्रीको प्रोत्साहन र नेतृत्वमा यो परियोजनाले आकार लिएको बताइन्। आज क्याप्सुललाई औपचारिक रूपमा सिल गरेर मुख्यमन्त्रीले यो क्षणलाई राज्यको इतिहासमा एक साँचो कोसेढुङ्गा बनाएको पनि उनले उल्लेख गरिन्।

उनले सरकारी विभागहरू, संस्थाहरू, विद्यालयहरू, समुदायहरू र 500 भन्दा बढी नागरिकहरूबाट प्राप्त विविध प्रस्तुतीहरूको लागि कृतज्ञता व्यक्त गरिन्, जसले भविष्यका नेताहरू, समुदायहरू र बालबालिकाहरूलाई प्रेरणा लिनको लागि स्थायी विरासत छोडिएको छ। कार्यक्रममा विभागकी अतिरिक्त सचिव अनिता सुब्बाले धन्यवाद ज्ञापन प्रस्तुत गरेकी थिइन्।

उल्लेख्य, टाइम क्याप्सुलको प्रतिकृतिको सार्वजनिक प्रदर्शन एमजी मार्गमा राखिएको छ। पारदर्शी शिशामा बन्द गरिएको यस प्रतिकृतिले आगन्तुकहरूलाई यसको सामग्री हेर्न तथा विगत र भविष्यबीचको प्रतीकात्मकता बुझ्न सक्नेछन्।

हिन्दुस्थान समाचार / बिशाल