सोरेङ, 22 अगस्त (हि.स.)। सिरिजङ्घा याकथुङ साकथिम फोजुम्बो (एसवाईएसपी) को दुई दिवसीय 45औं स्थापना दिवस समारोह आज सोरेङ जिल्लाको थर्पुस्थित लिम्बू सांस्कृतिक केन्द्रमा शुरू भएको छ। पहिलो दिनको कार्यक्रममा भवन तथा आवास विभागका मन्त्री भीमहाङ लिम्बू मुख्य अतिथि तथा विधायक एवं एसवाईएसपीका प्रमुख संरक्षक आदित्य गोले विशिष्ट अतिथि थिए।
सिरिजङ्घा याकथुङ साकथिम फोजुम्बोको स्थापना 23 अगस्त, 1980 मा भएको थियो। लिम्बू संस्कृति र परम्पराको संरक्षण र संवर्द्धनमा एसवाईएसपीले महत्वपूर्ण भूमिका निर्वाह गर्दै आएको छ।
मुख्य अतिथि मन्त्री लिम्बूले सिरिजङ्घा याकथुङ साकथिम फोजुम्बोलाई 45औं स्थापना दिवसको बधाई दिए। उनले लिम्बू भाषाका घट्दो साहित्यिक कृतिहरूप्रति चिन्ता प्रकट गर्दै उपस्थित सबैलाई यस दिशामा पहल गर्न आह्वान गरे। उनले हाम्रो भाषालाई बचाएर राख्ने जिम्मेवारी हामी सबैको हो भनी बताए।
यस अतिरिक्त, उनले मुख्यमन्त्री प्रेमसिंह तामाङको अगुवाईमा सिक्किम सरकारले लिम्बू समुदायको पक्षमा गरेका उल्लेखनीय उपलब्धीहरू र जारी परियोजनाहरूको बारेमा जानकारी गराए। उनले सम्पूर्ण लिम्बू समुदायको पक्षमा मुख्यमन्त्रीप्रति हार्दिक कृतज्ञता प्रकट गरे।
कार्यक्रममा कञ्चनजङ्घा राज्य विश्वविद्यालयका सहायक प्राद्यापक डा. बीएल खामदाक स्रोत वक्ताका रूपमा उपस्थित थिए। कार्यक्रममा बुद्धबिर सुब्बाले यीबा लाङमाथि विशेष कार्यशाला सम्पन्न गरेका थिए।
हिन्दुस्थान समाचार / बिशाल
