दार्जिलिङ, 22 अगस्त (हि.स.)। यसपालि चिया श्रमिकले 20% बोनस नै पाउनेछन् अनि पाउनुपर्छ भनी जीटीए प्रमुख अनित थापाले बताएका छन्। आज जारी एक प्रेस विज्ञप्तिमा अनिल थापाले भने, 'हरेक वर्ष श्रमिकहरू आन्दोलित बन्नु पर्छ। के को निम्ति? आफ्नो हक अनि अधिकारको लागि। बोनसको निम्ति मैले 20% को बेञ्च मार्क तय गर्दै श्रम मन्त्री मोलय घटकसँग धेरै लामो तर्क गरेको थिए। अन्त्यमा उनले पनि श्रमिकले बोनस 20% नै पाउनु पर्छ भन्ने मेरो अडानमा सहमति जनाए।'

उनले अब श्रमिकहरू श्रमिक भवनमा धरनामा बस्नु पर्दैन भन्दै आन्दोलन गर्नेहरूले मन बनाएका छन् भने अब आन्दोलन गर्ने विचार छोड्नुहोस भनी बताएका छन्। उनले अघि भने, 'कुटनीति भनेको यही हो। फेसबुकका सल्लाहकारको आइडियाले जीटीए चल्दैन भनेको हो। तिमीहरूको नकारात्मक सोचले श्रमिकलाई फाइदा हुँदैन भन्ने सन्देश हो। यसपालि चिया श्रमिकले 20% बोनस नै पाउनेछन्।।

थापाले अघि भने, 'पश्चिम बङ्गाल सरकारको श्रम विभाग, दार्जिलिङ नर्थ रीजनल जोनबाट 22 अगस्त, 2025 मा जारी गरिएको सल्लाह पत्र‌, आर्थिक वर्ष 2024-25 का लागि दार्जिलिङ, खरसाङ, कालिम्पोङ, तराई अनि डुवर्स क्षेत्रका चिया बगानका श्रमिकहरूलाई 20% बोनस दिने निर्णय गरिएको छ। जसको तलब बोनस पाउने सीमा नाघेको छ, ती कर्मचारीहरूलाई बोनस दिइँदैन, तर केवल त्यो सीमा काटेको वर्षमा मात्रै बोनस दिइन्छ। बोनसको भुक्तानी 15 सेप्टेम्बर, 2025 भित्र गर्नुपर्नेछ।'

अनित थापाले अझ भने, 'निर्देश पत्रमा बगान व्यवस्थापन र श्रमिकहरूका लागि विभिन्न स्पष्ट निर्देशन छ, विशेष गरी बोनसको भुक्तानी समयसीमा र योग्यता सम्बन्धी। सरकारले निर्देश दिइसक्यो। अब पालो चिया बगानका मालिकहरुको। 20% बोनस न्यूनतम बोनस दर हो। यस निर्देशलाई पालन गर्नुहुनेछ भन्ने मेरो विश्वास छ। म पहाडमा कुनै अशान्ति चाहदिन। न त बगानमा कुनै झमेला। यसपालि चिया श्रमिकले 20% बोनस नै पाउनेछन् अनि पाउनुपर्छ।'

हिन्दुस्थान समाचार / हनोक