खरसाङ, 22 अगस्त (हि.स.)। तीनधारे उच्चत्तर माध्यमिक विद्यालयका अवकाशप्राप्त अशिक्षणकर्मी सुकचन्द्र लिम्बूको आज बिदाई समारोह आयोजन गरियो। उक्त बिदाई समारोहको अध्यक्षता विद्यालयकी शिक्षिका प्रभारी रञ्जना प्रधानले गरेकी थिइन् भने प्रमुख अतिथिको रुपमा अवकाशप्राप्त अशिक्षणकर्मी सुकचन्द्र लिम्बू उपस्थित रहेका थिए।
शिक्षिका सञ्जुली छेत्रीले स्वागत सम्भाषण राखेको कार्यक्रमको सञ्चालन शिक्षकद्वय देवेन मंगर र सुप्रेम छेत्रीले गरेका थिए।
समारोहमा अवकाशप्राप्त अशिक्षणकर्मी सुकचन्द्र लिम्बूलाई विद्यालयको तर्फबाट खदार्पणसहित जातीय टोपी पहिराएर शल ओढाएर साथै सम्बर्द्धना पत्र र उपहारहरु प्रदान गरेर सम्मान जनाइयो। अवकाशप्राप्त लिम्बूकी पत्नीलाई पनि सम्मानित गरिएको थियो। कार्यक्रममा लिम्बूले आफ्नो वक्तव्यमा 1997 सालमा एकजनामा किरानीको रुपमा नियुक्त भएर काम शुरु गरेको र 28 वर्ष 5 महिना 19 दिनपछि अवकाशप्राप्त गरेको बताए। उनले आफ्नो कार्यका अनुभवहरु साझा गरेका थिए भने कार्यकालमा सहयोग गर्ने सबैप्रति आभार प्रकट गरेका छन्। कार्यक्रमकी सभाध्यक्ष प्रभारी शिक्षिका रञ्जना प्रधानले आफ्नो अध्यक्षीय सम्भाषणमा सुकचन्द्र लिम्बू मृदुभाषी, मिलनसार र सयमले भरिपूर्ण व्यक्ति रहेको बताउँदै सुखमय अवकाशप्राप्त जीवनको शुभकामना व्यक्त गरेकी छन्। उनले अवकाशप्राप्त गरेपछि पनि उनको समाजमा योगदान रहने आशा व्यक्त गर्दै सुस्वास्थ्यको कामना गरिन्। उनले सुकचन्द्र लिम्बूको विद्यालयप्रतिको योगदानको सदैव सम्झना रहने बताइन्।
यस बिदाई कार्यक्रममा शिक्षकद्वय भास्कर थापा र विशालमणि प्रधानले कविता वाचन, स्वयम गजमेर, शिक्षक सुप्रेम छेत्री साथै विद्यार्थीहरुद्वारा सामूहिक गीत र छात्राहरुले नृत्य प्रस्तुत गरेका थिए।
अवकाशप्राप्त अशिक्षणकर्मी सुकचन्द्र लिम्बूले सन् 1997 मा किरानीको पदमा विद्यालयमा नियुक्ति पाएका थिए भने 28 वर्ष 5 महिना 19 दिन काम गरेर प्रधान किरानीको रूपमा 28 फरवरी 2025 मा अवकाशप्राप्त गरेका थिए। कार्यक्रममा शिक्षक शिक्षिकाहरु, विद्यार्थीहरु, अशिक्षणकर्मीहरु र विद्यालय सञ्चालन समितिका सभापति रबीन गजमेर र सचिव अमीत प्रधान पनि उपस्थित रहेका थिए।
---------------
हिन्दुस्थान समाचार / हनोक
