गान्तोक, 22 अगस्त (हि.स.)। इन्द्रबहादुर राई (इबरा) साहित्य प्रतिष्ठानले मिरिक महकुमाको तराई क्षेत्र पानीघट्टामा भव्य रूपमा 33औं नेपाली भाषा मान्यता दिवस पालन गरेको छ। प्रतिष्ठानका अध्यक्ष जेम्स विश्वको अध्यक्षता तथा वरिष्ठ साहित्यकार राजबहादुर राईको प्रमुख आतिथ्यमा सम्पन्न कार्यक्रममा सिक्किमका व्यङ्ग्यकार तथा उपन्यासकार मेघनाथ दाहालकृत दोस्रो उपन्यास साँघुको पनि लोकार्पण गरिएको छ।

लोकतान्त्रिक भनिएको व्यवस्थामा कसरी जनताले मौलिक अधिकार समेतका लागि लड़ाइँ गरिरहनुपर्दछ र कसरी उसको अस्तित्वमाथिको शोषणको जाँतो घुमिरहन्छ, त्यसको औपन्यासिक समाज-सौन्दर्यको नवीनतम र प्रभावी प्रयोग गरिएको उपन्यास 'साँघु' को कार्यक्रमका प्रमुख अतिथि, विशिष्ट अतिथि तथा पत्रकारहरूको बाहुलीबाट लोकार्पण गरिएको थियो भने कृति र कृतिकारको परिचय आयोजक समितिका सचिव सुभाष दाहालले गराएका थिए।

स्मरण गराइन्छ, बेस्टसेलर उपन्यास 'दफन' बाट प्रसिद्धि कमाइसकेका मेघनाथ दाहाल गहिरो सामाजिक चिन्तनका धनी हुन्। सिक्किमे नेपाली साहित्यमा एक मौन तर महत्त्वपूर्ण साहित्यसेवी हस्ताक्षर हुन् उनी। सक्रिय अध्येताका रूपमा चिनिने र सामाजिक गतिविधिमा गुरुत्त्वपूर्ण दखल राख्ने दाहालले विशेषगरी स्तरीय व्यङ्ग्य लेखनबाट आरम्भिक परिचय कमाएका हुन्।

१३ मार्च, सन् १९५९ का दिन सिक्किममा जन्मिएका दाहालका 'ठूलो भाइसित चिया पसलमा' (व्यङ्ग्य कथा), 'आफैलाई चिथोर्छ मानबहादुरको देश' (कथात्मक व्यङ्ग्य) प्रकाशित रहेका छन् भने सिक्किमको जैविक अभियानमाथि एउटा पुस्तिका समेत प्रकाशित रहेको छ।

हिन्दुस्थान समाचार / बिशाल