- 90 वटा अनलाइन गेमिङ साइट बन्द, 32 करोड़ रूपियॉं जफत
गान्तोक, 22 अगस्त (हि.स.)। सिक्किम पुलिसले अवैध अनलाइन गेमिङ साइटहरू विरुद्ध आफ्नो कारबाही तीव्र पारेको छ। यस क्रममा अहिलेसम्म 90 वटा यस्ता साइट बन्द गरिएका छन् भने करोड़ौं रूपियॉं फ्रीज गरिएको छ। उक्त जानकारी सिक्किम पुलिसका डीआईजी (सीआईडी) तेन्जिङ लोडेन लेप्चाले आज राजधानीको पुलिस मुख्यालयमा आयोजित एक पत्रकार सम्मेलनमा दिएका हुन्।
डीआईजी लेप्चाले गत जुलाई महिनामा अवैध अनलाइन गेमिङ साइटहरू विरुद्ध शिकायत प्राप्त भएपछि यस विरुद्ध गहन कारबाही शुरू गरिएको जानकारी गराए। उनले यी गेमिङ साइटहरू विदेशहरूमा पञ्जीकृत रहेकाले यसलाई यहॉं ब्लक गर्न निकै कठिन र चुनौतीपूर्ण कार्य बनेको अवगत गराए। यसपछि, टेलिकम सर्भिस प्रोभाइडरहरू मार्फत यस्ता साइटहरू ब्लक गर्न शुरू गरिएको उनले बताए।
डीआईजी लेप्चाले यसपछि अनलाइन गेमिङको रकमसॅंग सम्बन्धित पॉंचवटा ब्याङ्क खाता फ्रीज गरिएको जानकारी गराए। यी ब्याङ्क खाताहरूमा 32 करोड़ रूपियॉं जमा रहेको उनले बताए। उनले अहिलेसम्म 90 वटा अवैध अनलाइन गेमिङ साइटहरू बन्द गरिएको बताए। उनले सिक्किममा खेलो नामक अनलाइन गेमिङ निकै प्रचलित रहेको र राज्यमा लगभग 25 हजार प्रयोगकर्ता रहेको बताए।
यस अतिरिक्त, उनले राज्यमा फेक इनभेस्टमेन्ट स्क्याम पनि बढ्दो रहेको जानकारी गराए। राम्रो रिटर्नको लोभ देखाउॅंदै क्रिप्टो करेन्सीमा निवेश गर्न लगाएर ठग्ने कार्य चलिरहेको उनले बताए। उनले मानिसहरूलाई सचेत बन्न र यदि कसैले राम्रो रिटर्नको लोभ देखाउॅंदै निवेश गर्न लगाउॅंछन् भने यसको पुलिसलाई सूचना दिइहाल्न अपील गरे।
यस अघि सिक्किम स्टेट लटरीका निदेशक पवन अवस्थीले अवैध अनलाइन गेमिङ विरुद्ध दिसम्बर 2023 देखि कारबाही शुरू गरिएको जनकारी गराए। उनले सिक्किममा अनलाइन गेमिङको लतमा फसेर मानिसहरूले धेरै पैसा गुमाइरहेको र पैसा गुमाएपछि आत्महत्या समेत गरिरहेको घटना अघि आउन थालेको अवगत गराए। उनले यस्ता अवैध साइटहरू विरुद्ध एफआईआर दर्ता गरिएको र डीआईजी (सीआईडी) तेन्जिङ लोडेन लेप्चाले कार्यभार सम्हालेपछि यस विरुद्ध कारबाही तीव्र गतिमा अगाडि बढेको बताए।
हिन्दुस्थान समाचार / बिशाल