गान्तोक, 22 अगस्त (हि.स.)। ओभिया आर्ट सर्कल, सिक्किमले 23 देखि 25 अगस्त, 2025 सम्म तीन दिने चित्रकला प्रदर्शनी तथा कार्यशाला राजधानीको भानु उद्यान, जिरो पोइन्टमा आयोजना गर्ने भएको छ। यस कार्यशालामा सिक्किमका वरिष्ठ तथा दिग्गज चित्रकारहरूको साथमा अतिति कलाकारहरू नेपाल ललितकला प्रज्ञा प्रतिष्ठानबाट सहभागी हुनेछन्।
ओभिया आर्ट सर्कलको यस कार्यक्रमको निम्ति मुख्यमन्त्रीका राजनीतिक सचिव जेकब खालिङ प्रमुख संरक्षक रहेका छन्। यस कार्यक्रममा सिक्किमका वरिष्ठ चित्रकारहरूको साथमा छिमेकी राष्ट्र, नेपाल प्रज्ञा प्रतिष्ठानकाका कुलपतिको साथमा प्रतिष्ठित कलाकारहरूले सहभागिता जनाउने छन्।
अतिथि कलाकारहरूमा काठमाडौंबाट संजय वान्तवा, नरेन्द्र बहादुर श्रेष्ठ, जुपिटर प्रधान, लीलाधर केसी र विपना महर्जन रहेका छन्। यसरी नै महेन्द्र राई, धरान, मनोज तामाङ, पोखरा, छितेन शेर्पा, काकडभिट्टा र रूबी पाठक, जनकपुरबाट रहेका छन्।
यस प्रदर्शनीमा विशेष गरेर, गान्तोक वरिपरिका सरकारी विद्यालय अनि महाविद्यालयका विद्यार्थीहरूका लागि चित्रकला प्रतियोगिता पनि राखिएको छ। ओभिया आर्ट सर्कलले सबै कलाप्रेमीहरूलाई कार्यक्रममा हार्दिक निम्तो गरेको छ।
सिक्किममा चित्रकलाको विकास तथा जनमानस र विद्यार्थीहरूलाई सचेत गराउने दिशामा ओभिया आर्ट सर्कलले धेरै अघिदेखि काम गर्दै आइरहेको छ। यसबाहेक, सर्कलले धेरै समाज सेवाका कार्यहरू सिक्किमका सरकारी स्कूल, समेकित बाल विकास केन्द्रहरू, उद्यान, सरकारी अस्पताल आदिमा गरिसकेको प्रेस विज्ञप्तिमा उल्लेख छ।
हिन्दुस्थान समाचार / बिशाल