गान्तोक, 22 अगस्त (हि.स.)। 34औं सिक्किम राज्य ब्याडमिन्टन च्याम्पियनशिप 2025 आज (शुक्रवार) देखि राजधानीको पाल्जोर स्टेडियम कम्प्लेक्सस्थित इन्डोर ब्याडमिन्टन हलमा शुरू भएको छ। ब्याडमिन्टन एसोसिएशन अफ् सिक्किमले ब्याडमिन्टन एसोसिएशन अफ् इण्डियाको तत्वावधानमा आयोजना गरिरहेको यस प्रतियोगिताको समापन आगामी 25 अगस्त, 2025 का दिन हुनेछ।

उद्घाटन समारोहमा आज राज्य सामाजिक कल्याण विभाग मन्त्री साम्डुप लेप्चा मुख्य अतिथि थिए। यसैगरी, विशिष्ट अतिथिहरूमा ब्याडमिन्टन एसोसिएशन अफ् सिक्किमका अध्यक्ष जेकब खालिङ, सिक्किम ओलम्पिक एसोसिएशनका अध्यक्ष कुबेर भण्डारी, गान्तोक नगर निगमकी उपमेयर छिरिङ पाल्देन भोटिया आदि उपस्थित थिए।

मुख्य अतिथि मन्त्री लेप्चाले 34औं सिक्किम राज्य ब्याडमिन्टन च्याम्पियनशिप 2025 आधिकारिक रूपमा शुरू भएको घोषणा गरे। उनले खेलाडीहरूलाई प्रोत्साहित गर्न आफू यहॉं उपस्थित भएको बताए। उनले युवाहरूलाई खेलकुदमा जोड दिन प्रोत्साहित गर्दै खेलकुदले अनुशासन सिकाउनुका साथै स्वस्थ बनाएर रोगमुक्त बनाउॅंछ भनी बताए।

पत्रकारहरूसॅंग कुराकानी गर्दै ब्याडमिन्टन एसोसिएशन अफ् सिक्किमका अध्यक्ष जेकब खालिङले यो टुर्नामेन्ट एसोसिएशनको वार्षिक कार्यक्रम रहेको जानकारी गराए। उनले जिल्लाहरूमा सम्पन्न विभिन्न ऱ्याङ्कीङ खेलहरूमा उत्कृष्ट प्रदर्शन गर्ने खेलाडीहरूलाई लिएर आजदेखि स्टेट च्याम्पियनशिप शुरू भएको जानकारी गराए। यस टुर्नामेन्ट अन्तर्गत अन्डर-9 र खुला वर्गमा राज्यका छवटै जिल्लाबाट 250 भन्दा धेरै खेलाडीहरू सहभागी रहेको बताए।

अध्यक्ष खालिङले यस टुर्नामेन्टमा विजेताहरूले आगामी दिनहरूमा हुने नर्थइस्ट च्याम्पियनशिप र राष्ट्रिय च्याम्पियनशिपहरूमा खेल्न पाउने बताए। उनले यो टुर्नामेन्ट एक प्रकारले छनोट परीक्षण पनि रहेको बताउॅंदै विभिन्न वर्गका विजेताहरूलाई स्टेट च्याम्पियनको रूपमा पुरस्कृत गरिने बताए।

यसरी नै एसोसिएशनका महासचिव सुकान्त दासले यस टुर्नामेन्टमा अन्डर-9, मेन्स, वुमन्स र मिक्स्ड वर्गमा खेलाडीहरूले भाग लिइरहेको जानकारी गराए। उनले यस टुर्नामेन्टका विजेताहरूले त्रिपुरामा हुने नर्थइस्ट जोनल र राष्ट्रिय टुर्नामेन्टमा सिक्किम राज्यलाई प्रति​निधित्व गर्नेछन् भनी बताए।

हिन्दुस्थान समाचार / बिशाल