खरसाङ, 23 अगस्त (हि.स.)। पश्चिम बङ्गाल सरकारको श्रम विभागबाट यसपाली चियाबारी श्रमिकहरुलाई 20 प्रतिशत बोनस दिनुपर्ने एडभाजरी जारी गरिएकोमा भारतीय गोर्खा प्रजातान्त्रिक मोर्चाको भातृ संगठन हिल तराई डुवर्स प्लान्टेशन वर्कर्स युनियन खरसाङ महकुमा समितिको तर्फबाट जीटीए प्रमुख एवं भारतीय गोर्खा प्रजातान्त्रिक मोर्चाको केन्द्रिय संस्थापक अध्यक्ष अनित थापालाई धन्यवाद दिइएको छ।
चियाबारी श्रमिकहरुको लागि जीटीए प्रमुख अनित थापाको पहलका कारण राज्य सरकारले बीस प्रतिशत बोनस दिनुपर्छ भन्ने एडभाइजरी जारी गरेको भन्दै खरसाङ महकुमा समितिले जीटीए प्रमुखलाई धन्यवाद दिएको छ। युनियनको खरसाङ महकुमा समितिका सभापति सागर गुरुङ र महासचिव भक्तिमान तामाङले एक प्रेस विज्ञप्ति जारी गर्दै श्रमिकहरुको पक्षमा सरकार समक्ष अनित थापाले बोलिदिएकाले यसपालीको बीस प्रतिशत बोनस दिनुपर्ने राज्य सरकारको श्रम विभागले एडभाइजरी जारी गरेको दाबी गरेको छ।
उल्लेखनीय छ, पश्चिम बंगाल सरकारको श्रम विभाग, दार्जिलिङ नर्थ रीजनल जोनबाट 22 अगस्त, 2025 मा जारी गरिएको सल्लाह पत्र, आर्थिक वर्ष 2024-25 का लागि दार्जिलिङ, खरसाङ, कालेबुङ, तराई अनि डुवर्स क्षेत्रका चिया बगानका श्रमिकहरूलाई 20% बोनस दिने निर्णय गरिएको छ। यसपाली 20 प्रतिशत बोनस दिने भनिएपछि हिल तराई डुवर्स प्लान्टेशन वर्कर्स युनियन खरसाङ महकुमा समितिको आयोजनामा खरसाङ महकुमाका विभिन्न कमानहरुमा गेट मिटिङ गरेर चियाबारी श्रमिकहरुलाई पनि जानकारी गराइएको छ।
यसका साथै महकुमा समितिले बीस प्रतिशत बोनसको लागि जीटीए प्रमुख अनित थापा, नर्थ बेंगालको श्रमायुक्त, श्रम मन्त्री मोलय घटक र मुख्यमन्त्री ममता ब्यानर्जीलाई धन्यवाद दिएको छ। यस क्रममा समितिको आयोजनामा जंगपाना चियाबारीमा सभापति सागर गुरुङको अध्यक्षतामा गेट मिटिङ सम्पन्न भएको, जसमा उनी लगायत पूर्व सचिव सन्तोष गुरुङले सम्बोधन गरेका थिए।
त्यसरी नै मन्टिभियट चियाबारीमा महकुमा उपाध्यक्ष किसान लेप्चाको अध्यक्षतामा, स्प्रिङ साइड चियाबारीमा महकुमा सचिव भक्तिमान तामाङको अगुवाईमा र गिताङ्गे चियाबारीमा भागोप्रमो तीनधारे महानदी समष्टिको सभापति राजीव थापाको अध्यक्षतामा गेट मिटिङ सम्पन्न भएको छ।
हिन्दुस्थान समाचार / हनोक
