गान्तोक, 23 अगस्त (हि.स.)। गत 25 जूनदेखी शुरु भएको यो वर्षको कैलाश मानसरोवर यात्रा समाप्त भएको छ। सिक्किमको नथुला पास भएर यो वर्ष कुल 454 यात्रीले मानसरोवरको यात्रा गरेका छन्। यो वर्षको यात्राको समापन कार्यक्रममा सूचना एवं जनसम्पर्क विभागका चेयरमेन असित राई मुख्यअतिथिका रूपमा उपस्थित थिए भने सिक्किम पर्यटन विकास निगमका अध्यक्ष लुकेन्द्र रसाइली विशेष रूपमा उपस्थित थिए।

मिडियाकर्मीहरुसित बोल्दै सिक्किम पर्यटन विकास निगमका अध्यक्ष लुकेन्द्र रसाइली र मुख्य कार्यकारी अधिकारी राजेन्द्र छेत्रीले नथुला पासबाट सम्पन्न यो वर्षको कैलाश मानसरोवर यात्रा सफल भएको बताए। मुख्य कार्यकारी अधिकारी राजेन्द्र छेत्री स्वयं पनि कैलाश मानसरोवर यात्राका एकजना यात्री थिए।

आगामी वर्षदेखि कैलाश मानसरोवर यात्रीहरुको संख्या वृद्धि गर्ने भारत सरकारको निर्णयलाई स्वागत गर्दै अध्यक्ष रसाइलीले सिक्किम पर्यटन विकास निगम यात्रा सञ्चालन गर्न पूर्ण सक्षम रहेको बताए। यसैगरी भारत तिब्बत सीमा पुलिसका डीआईजी सन्दीप कुमारले कैलाश मानसरोवर यात्रा सञ्चालन गर्ने आईटीबीपीलाई अवसर दिएकोमा भारत सरकार प्रति आभार व्यक्त गरेका छन्।

दस चरण गरि प्रत्येक चरणमा ५० जना यात्रीहरुलाई यात्रामा सामेल गराइएको थियो भने मेडिकल ग्राउण्डमा ६ जनाले कैलाश मानसरोवर यात्रामा सहभागिता जनाउन सकेनन्। कैलाश मानसरोवर यात्राबाट फर्केका यात्रीहरुले उत्साहपूर्वक यात्रा सफल भएको बताए भने समापन अवसरमा उनीहरुलाई प्रमाणपत्र पनि प्रदान गरियो।

हिन्दुस्थान समाचार / बिशाल