खरसाङ, 23 अगस्त (हि.स.)। आगामी 25 अगस्त बलिदान दिवसलाई लक्ष्य गरेर खरसाङको गाडीधुरास्थित नवदीप परिवारले आयोजना गरेको म कवि शब्दको नेपाली कविता वाचन प्रतियोगिताको पहिलो छनोट राउण्ड शनिवार सम्पन्न भयो। यस छनोट राउण्डमा मोठ सोह्रजना प्रतियोगीहरूले भाग लिएका थिए।

गाडीधुरा सार्वजनिक भवनमा सम्पन्न छनोट राउण्डको सञ्चालन अनुप रामुदामुले गरेका थिए भने यस राउण्डका निर्णायकहरूमा साहित्यकार सुदर्शन अम्बटे अनि पत्रकार एवम् साहित्यकार सुवास छेत्री भावुक थिए। प्रथम चरणको यस छनोट राउण्डबाट मोठ 6 जना प्रतियोगीहरू छनोट भएका छन्। जसमा पंखाबारी उच्चतर माध्यमिक विद्यालयका विद्यार्थीहरू ममता सुब्बा, प्रेरणा दियाली अनि अक्षता पाख्रीन, दुधेकी मान्ती सुनार ,लङ्भ्यूकी इच्छा घतानी अनि पानीघट्टा उच्चतर माध्यमिक विद्यालयकी प्रार्थना यादव छन्।

अब यी 6 जना प्रतियोगीहरूले आगामी 25 अगस्त बलिदान दिवसको दिन यहाँ आयोजित एक विशेष कार्यक्रममा आफ्नो प्रस्तुति दिनेछन् भने तिनीहरूमध्ये तीनजना प्रतियोगीहरूलाई प्रथम, दोस्रो अनि तेस्रो पुरस्कार प्रदान गरिनेछ। प्रथमपल्ट गाडीधुरा नवदीप परिवारको आयोजनामा सम्पन्न भइरहेको यस प्रकारको कार्यक्रमले परिवारको थप गरिमा र महत्व बढेर गएको अनुभव स्थानीयहरूले गरिरहेका छन्। उक्त दिन यहाँ बलिदान दिवसको कार्यक्रमसँगै सम्मानको कार्यक्रम पनि रहेको छ।

हिन्दुस्थान समाचार / हनोक