गान्तोक, 23 अगस्त (हि.स.)। राष्ट्रिय साङ्ख्यिकी कार्यालय (एनएसओ) क्षेत्र परिचालन प्रभाग (एफओडी) साङ्ख्यिकी एवं कार्यक्रम कार्यान्वयन मन्त्रालय, भारत सरकारले 2025 भरी राष्ट्रिय नमूना सर्वेक्षणको (एनएसएस) 75 औं वर्षगाँठ पालन गरिरहेको छ। यसै वर्षदिन लामो समारोह अन्तर्गत राष्ट्रिय साङ्ख्यिकी कार्यालय, एफओडी, क्षेत्रीय कार्यालय, गान्तोकद्वारा अगस्त महिनाको निम्ति तय कार्यक्रम 21 अनि 22 अगस्तको दिन आयोजित गरियो।

22 अगस्तको दिन माझीटार, रम्फूमा एकदिने डाटा प्रयोगकर्ता सम्मेलन आयोजित गरियो. जसमा विभिन्न औद्योगिक एकाइ अनि अन्य हितधारकले भाग लिए। यस अवसरमा सिक्किम सरकारको आर्थिक, साङ्ख्यिकी, निगरानी एवं मूल्याङ्कन निर्देशालयका संयुक्त निर्देशक थुप्देन गेलेग मुख्य अतिथिका रूपमा उपस्थित थिए।

कार्यक्रमको शुरुवातमा एनएसओ, आरओ, गान्तोकका सहायक निर्देशक डीआर शर्माले स्वागत सम्बोधनका साथ मन्त्रालयको गतिविधिबारे जानकारी दिँदै एनएसओद्वारा सम्पन्न सर्वेक्षणहरूको महत्त्वबारे अवगत गराए। यसका साथै एनएसएसद्वारा गरिने विभिन्न सर्वेक्षणको महत्त्वका साथै सरकारी नीतिहरू प्रतिपादित गर्न कसरी त्यसलाई प्रयोग गरिन्छ भन्ने जानकारी दिए।

वरिष्ठ साङ्ख्यिकी अधिकारी तेञ्जिङ छोडेनले एकाइहरूबाट सङ्कलन गरिने प्राथमिक वस्तु, इन्धन, ऊर्जा, विनिर्मित उत्पाद आदिको मूल्यका आधारमा तयार गरिने थोक मूल्य सूचकाङ्क (डब्लुपीआइ) बारे जानकारी दिइन्। यसका साथै थोल मूल्य सूचकाङ्क (डब्लुपीआइ) अनि आगत-निर्गत उत्पादक मूल्य सूचकाङ्क तयार गर्नका लागि वर्ष 2011-12 देखि 2022-23 सम्मको आधार वर्षका लागि संशोधनको निम्ति मूल्य बुझाउने प्रक्रियाबारे पनि विस्तृत प्रस्तुति दिइन्।

तथ्यपत्र अनि प्रमुख निष्कर्षहरूबारे जानकारीका साथै उद्योगहरूको वार्षिक सर्वेक्षण 2022-23 को आधारमा प्रकाशित प्रतिवेदनका आधारमा जीडीपी, जीभीए, रोजगार, पूँजी निर्माण, निर्यात आदिको राज्य अनि राष्ट्रिय स्तरमा विभिन्न क्षेत्र अनि उपक्षेत्रको योगदानबारे शिवराज राईले अवगत गराए.

मुख्य अतिथिका रूपमा उपस्थित संयुक्त निर्देशक थुप्देन गेलेगले सर्वेक्षणका आधारमा एनएसएस र डीईएसएमईद्वारा तयार एवं प्रकाशित प्रतिवेदनहरूको महत्त्व अनि प्रयोगबारे जानकारी दिँदै प्रतिभागीहरूलाई समयबद्ध रूपमा सटीक तथ्याङ्क दुवै राज्य अनि केन्द्र सरकारका अभिकरणहरूलाई बुझाउन आग्रह गरे।

एसएसओ तुबै दत्तले एनएसएसद्वारा गरिएका अन्य सर्वेक्षणहरूबारे जानकारी दिँदै धन्यवाद ज्ञापन पेश गरे। डीईएसएमईका एडी केशरसिंह पौड्याल लगायत औद्योगिक एकाइहरूबाट 54 जनाले कार्यक्रममा भाग लिएका थिए।

यसैगरी 21 अगस्तको दिन राष्ट्रिय साङ्ख्यिकी कार्यालय (एनएसओ) द्वारा गरिएका विभिन्न सर्वेक्षण तथा त्यसका महत्त्वबारे जागरूकता फैलाउन सोरेङ जिल्लाको सुल्डुङ-कामलिङ ग्राम पञ्चायत भवनमा सामुदायिक चर्चा-परिचर्चा कार्यक्रम आयोजित गरियो।

यस अवसरमा जीपीयुका सभापति जीटी लेप्चा, उपसभापति श्रीमती टीकामाया कामी तथा अन्य पञ्चायत सदस्य मुख्य अतिथि अनि विशेष अतिथिका रूपमा उपस्थित थिए।

एनएसओ, आरओ, गान्तोकका सहायक निर्देशक डीआर शर्माले प्रतिभागीहरूलाई स्वागत जनाउँदै मन्त्रालयको विभिन्न गतिविधि तथा एनएसओद्वारा गरिने सर्वेक्षणहरूको महत्त्वबारे जानकारी दिए। एनएसएसद्वारा गरिने विभिन्न सर्वेक्षणको महत्त्वबारे प्रकाश पार्दै सरकारी नीति प्रतिपादित गर्न त्यसको प्रयोगबारे उनले जानकारी दिए। क्षेत्रमा सर्वेक्षणको समय एनएसएसका अधिकारीहरूलाई सहयोग गर्न उनले पञ्चायत अनि जनमानसलाई आग्रह गरे।

वरिष्ठ साङ्ख्यिकी अधिकारी तुबै दत्तले सामयिक श्रम बल सर्वेक्षण, एएसयुएसई, सामाजिक-आर्थिक सर्वेक्षण, मूल्य सूचकाङ्क आदि तयार गर्न विभिन्न बजारबाट गरिने मूल्यको सर्वेक्षण लगायतका एसएसओद्वारा गरिने बृहत् स्तरको सर्वेक्षणबारे अवगत गराए।

पञ्चायत सभापति जीटी लेप्चाले आफ्नो सम्बोधनमा यस प्रकारको ज्ञानवर्धक कार्यक्रम जीपीयुमा आयोजित गरिदिएकोमा आभार व्यक्त गर्दै तथ्याङ्क सङ्कलनको समय आउने एनएसएसका अधिकारीहरूलाई सबै प्रकारको सहयोग गर्ने आश्वासन दिए।

कार्यक्रमको अन्त्यमा पञ्चायत भवनको वरिपरी बिरुवा रोपन गरियो। यस पहलमा जीपीयुका पञ्चायत सदस्य, ग्राम प्रशासन केन्द्रका कर्मचारी लगायत आरओ गान्तोकका अधिकारीहरूले भाग लिए। स्कूल परिसरमा पनि फूल फुल्ने तथा सुन्दरता बढाउने बिरुवाहरू रोपन गरियो।

विभिन्न सर्वेक्षणबारे जनमानसमा जागरूकता फैलाउने उद्देश्यका साथ योजनाबारे पर्चा अनि पुस्तिकाहरू पनि जीपीयुका पञ्चायत, जनता अनि पसलेहरूमाझ वितरण गरियो।

हिन्दुस्थान समाचार / बिशाल