- मुख्यमन्त्रीद्वारा युवाहरूमा क्षेत्रीय भाषाहरूको घट्दो चासोप्रति चिन्ता व्यक्त

सोरेङ, 23 अगस्त (हि.स.)। सिरिजङ्घा याकथुङ साकथिम फोजुम्बोको 45औं स्थापना दिवस आज सोरेङ जिल्लाको थर्पुमा भव्यरूपमा सम्पन्न गरियो। लिम्बू सांस्कृतिक केन्द्रमा आयोजित समारोहमा मुख्यमन्त्री प्रेमसिंह तामाङ मुख्य अतिथि थिए। मुख्यमन्त्रीको साथमा उनकी धर्मपत्नी शारदा तामाङ पनि उपस्थित थिइन्।

कार्यक्रमलाई सम्बोधन गर्दै मुख्यमन्त्री तामाङले सिरिजङ्घा याकथुङ साकथिम फोजुम्बोका संस्थापक सदस्यहरूले लिम्बू समुदायको समृद्ध संस्कृति र परम्पराहरूको संरक्षणको लागि गरेका अथक प्रयासको लागि सम्मान व्यक्त गरे। संस्कृतिको संरक्षणमाथि जोड दिॅंदै उनले यस्ता उत्सवहरूले साम्प्रदायिक एकतालाई बलियो बनाउने हुनाले राज्यवासीहरूले सबै समुदायहरूको उत्सवहरू गर्वका साथ मनाउनु पर्छ भनी आह्वान गरे।

मुख्यमन्त्रीले राज्य सरकारद्वारा सबै समुदायहरूको परम्परा र प्रथाहरूको संरक्षण र संवर्द्धनको लागि गरिएका प्रयासहरूको बारेमा जानकारी गराए। उनले आफ्नो सम्बोधनमा विशेषगरि युवाहरूमा क्षेत्रीय भाषाहरूको घट्दो चासोप्रति चिन्ता व्यक्त गरे। उनले युवाहरूलाई साहित्यिक कार्यहरूमा रुची बढाउने आह्वान गर्दै यस्ता आकांक्षी युवाहरूलाई सरकारको तर्फबाट सहायताको आश्वासन दिए।

उनले आगामी वर्ष अझ भव्यरूपमा कार्यक्रम आयोजना गर्ने आश्वासन दिए। उनले युवा पीढीमा सांस्कृतिक धरोहरको संरक्षणलाई बढावा दिनुपर्ने आवश्यकतामा जोड दिॅंदै समुदायको परम्परागत भेषभूषालाई लिएर कार्यशाला आयोजन गर्न सुझाउ राखे। थर्पुमा कृष्ण प्रणामी मन्दिर परियोजनाको प्रस्तावमाथि बोल्दै उनले भव्यरूपमा मन्दिर निर्माण गर्ने आश्वासन दिए। क्षेत्र विधायकले राखेका प्रस्तावबारे बोल्दै उनले वृद्धहरूका लागि वेलनेश पार्क विकास गर्ने इच्छा व्यक्त गरे।

कार्यक्रमलाई सोरेङ च्याखुङ निर्वाचन क्षेत्रका विधायक आदित्य गोले र लोकसभा सांसद डा. इन्द्रहाङ सुब्बाले पनि सम्बोधन गरेका थिए। कार्यक्रममा मुख्यमन्त्री र उनकी धर्मपत्नीलाई समारोह आयोजक समितिको तर्फबाट सम्मानित गरियो। यसैगरी, वास्तुकार जेबी सुब्बा र कलाकार बल बहादुर लिम्बूलाई पनि लिम्बू समुदायप्रति उनीहरूको योगदानको लागि सम्मानित गरियो।

हिन्दुस्थान समाचार / बिशाल