69औं पटक रक्तदान गरेपछि सनीले भने— “रक्तदान नै सबैभन्दा ठूलो दान हो”

हुगली/धनबाद, 24 अगस्त (हि. स.)। दुई दशकपूर्व एक रक्तदान शिविरमा भाग लिने सनी आज समाजको लागि प्रेरणा बनिसकेका छन्। उनको भनाइ छ, रक्तदानभन्दा ठूलो सेवा कुनै छैन। कुनै आवश्यकतामा परेका मानिसलाई मद्दत गर्न पाउँदा यस्तो लाग्छ, मेरो जीवन सार्थक भयो।

आइतवार झारखण्डको धनबादमा पथ प्रदर्शक मिशनद्वारा आयोजित रक्तदान शिविरमा सनीले 69औं पटक रक्तदान गरे। यस अवसरमा उनले हिन्दुस्थान समाचार-सित भने, उनी जहाँ पनि जान्छन् त्यहाँ रक्तदान शिविरमा सामेल हुने चेष्टा गर्दछन् वा आफै रक्तदान गरेर मानिसहरूलाई जागरूक गराउँदछन्।

सनी पश्चिम बंगालको हुगली जिल्लास्थित सानो शहर रिषड़ामा बस्छन्।

सनीले बताए, रक्तदान उनको आदत होइन एक अभियान हो। उनले भने, धेरै जना मानिसहरू रक्तदान गर्नदेखि डराउँछन्, तर यो एकदमै सुरक्षित छ र शरीरमा कुनै दुष्प्रभाव पार्दैन। मानिसहरूको मनबाट यो डर निकाल्न आवश्यक छ कि रक्तदानबाट कमजोरी हुन्छ। यसको विपरीत यसले शरीरलाई अझ स्वस्थ र सक्रिय बनाउँछ।

सनीले भने, उनी कुनै पनि नौलो शहर वा क्षेत्रमा गएको बेला त्यहाँका युवाहरूलाई जागरूक गराउने गर्दछन् अनि स्वयं रक्तदान गरेर उदाहरण पेश गर्दछन्। सनीको लगन र निरन्तरताले वरपरका युवाहरूलाई पनि प्रेरित गरेको छ। उनका साथी एवं सहयोगीहरू अब नियमित रक्तदाता बनिसकेका छन्। स्थानीय सामाजिक संगठनले पनि उनको यस प्रयासको सराहना गर्दै उनलाई “जीवन्त प्रेरणा” बाएको छ।

69औं पटक रक्तदान गरेपछि सनीले युवाहरूसित अपील गर्दै भने, आज पनि अस्पताल अनि ब्लड ब्यांकहरूमा रगतको ठूलो अभाव रहन्छ। यस्तो अवस्थामा यदि हरेक स्वस्थ व्यक्तिले वर्षमा न्यूनतम दुई पटक रक्तदान गरे हजारौं जीवनलाई बचाउन सकिन्छ।

हिन्दुस्थान समाचार / उष्णता छेत्री शर्मा