खरसाङ, 24 अगस्त (हि.स.)। घैयाबारी नेताजी हाई स्कूलकी अवकाशप्राप्त सह-शिक्षिका अनिता गजमेरको विदाई समारोह सम्पन्न गरिएको छ। उनले 39 वर्षको लामो समयसम्म नेताजी हाई स्कूल घैयाबारीमा सेवा पुऱ्याएर अवकाश ग्रहण गरेकी छन्।

विदाई समारोहमा स्कूलका सचालन समितिका सभापति केवल राई, भूतपूर्व शिक्षक प्रभारी शेखरचन्द्र प्रधान, भूतपूर्व सह-शिक्षक किशोर क्षेत्री, भूतपूर्व शिक्षिका इन्दिरा गुरूङ, भूतपूर्व अशिक्षणकर्मी भीमराज खाती, घैयाबारी नेताजी प्राथमिक पाठशालाका प्रधान अध्यापक विजय कुमार गुरूङ अनि उनका सह-शिक्षक, शिक्षिका साथै भूतपूर्व विधार्थीहरुको पनि उपस्थिति रहेको थियो।

यस कार्यक्रममा स्कूलका नानीहरुले नृत्य, गीत, कविता वाचन, नाटक प्रस्तुत गरेका थिए। साथै अवकाशप्राप्त गुरुमा अनिता गजमेर सम्बन्धि वृत्तचित्र पनि प्रदर्शन गरिएको थियो। कार्यक्रममा विद्यालय पक्षबाट गुरूमा अनिता गजमेरलाई स्कूलका प्रधान अध्यापक दिनेस प्रधानले शल ओढाएर, सम्वर्द्धना पत्र साथै स्मृति चिन्ह प्रदान गरेर सम्मान जनाए।

विद्यालयका नानीहरुले पनि गुरुमालाई खदा माला लगाएर सम्मान जनाए। कार्यक्रमलाई भूतपूर्व शिक्षक प्रभारी शेखरचन्द्र प्रधानले सम्बोधन गरे। यस कार्यक्रममा शिक्षिका अनिता गजमेरले विद्यालयका नानीहरुको निम्ति केही आर्थिक सहयोग पनि प्रदान गरिन्।

हिन्दुस्थान समाचार / हनोक