खरसाङ, 24 अगस्त (हि.स.)। गोपाल योञ्जन संगीत सम्मान यसपाली संगीतकार बरुण रसाइली र गीतकार सुकुमार बराईलीलाई प्रदान गरिने भएको छ। गौरव मञ्च तीनधारेको आयोजनामा 2023 देखि शुरु गरिएको वाङ्गेयकार गोपाल योञ्जन संगीत पुरस्कार यसपाली तीनधारे क्षेत्रका संगीतकार एवं संगीतमा गुरुजी बरुण रसाइली र तीनधारे चियाबारी निवासी गीतकार सुकुमार बराईलीलाई प्रदान गरिने भएको छ।
उक्त पुरस्कार गौरव मञ्च तीनधारेको आयोजनामा आगामी 30 अगस्तका दिन आयोजना गरिने कार्यक्रममा प्रदान गरिने छ। उक्त जानकारी गौरव मञ्च तीनधारेका संयोजक सुप्रेम छेत्री र सदस्ता युवराज सुन्दासले गराएका छन्। उनले गौरव मञ्च तीनधारेले 2023 देखि स्थानीय संगीतकार र कलाकारहरुलाई सम्मान जनाउने क्रम शुरु गरेको बताए।
यस अन्तर्गत पहिलोपटक 2023 मा संगीतकार सुरेन बम्जनलाई यो सम्मान प्रदान गरिएको थियो। त्यसपछि गत वर्ष 2024 मा गायक संगीतकारहरु क्रमैले गोपाल गजमेर, गौतम मोक्तान र चन्दु भुसाललाई प्रदान गरियो। यसपाली यो सम्मान तीनधारेकै संगीतकार बरुण रसाइली र गीतकार सुकुमार बराईलीलाई प्रदान गरिने छ।
हिन्दुस्थान समाचार / हनोक
