खरसाङ, 25 अगस्त (हि.स.)। पश्चिम बंगाल सरकारको श्रम मन्त्रालयले दार्जिलिङ पहाड र तराईका चियाबारी श्रमिकहरुको लागि यसपाली बीस प्रतिशत बोनस दिनु पर्ने एडभाइजरी जारी गरेकोमा पहाडका विभिन्न चियाबारीहरुबाट धन्यवाद दिने कार्य जारी रहेको छ।
यसै क्रममा तीनधारे महानदी समष्टिको गिताङ्गे, नरबुङ, सिपाहीधुरा र सिलिम हिल आदि चियाबारीहरुमा गेट मिटिङ गरेर जीटीए प्रमुख कार्यपाल अनित थापालाई धन्यवाद दिइएको छ। तीनधारे महानदी समष्टिको गिताङ्गे चियाबारीको क्रेज हाउसमा एक गेट मिटिङ गरेर बीस प्रतिशत बोनसको मागलाई सही तरिकाले श्रमिकहरुको पक्षमा अगाडि बढाइदिएको भन्दै जीटीए प्रमुख अनित थापालाई धन्यवाद दिए।
गेट मिटिङ गिताङ्गे शाखाका सभापति पुरण छेत्रीको अध्यक्षतामा सम्पन्न भयो भने सभामा ट्रेड युनियन, नारी शक्ति र युवा शक्तिका प्रतिनिधिहरु र भागोप्रमो तीनधारे महानदी समष्टिका सभापति राजीव थापा उपस्थित रहेका थिए। यसरी नै नरबुङ चियाबारीमा युनिट कमिटीका सभापति विकास गुरुङको अध्यक्षतामा गेट मिटिङ सम्पन्न भयो।
यस गेट मिटिङमा नरबुङ बुथ कमिटीका सभापति प्रणय देवान, युनिट कमिटीको सचिव रोशन सुब्बा, शिवखोला ग्राम पञ्चायतकस उप प्रधान अम्बिका देवान र ट्रेड युनियन तीनधारे महानदी समष्टिका संयोजक राजेस थापा उपस्थित रहेका थिए। वक्ताहरुले गत वर्ष बोनसको लागि श्रमिकहरुले धेरै दुःख पाएकाले यसपाली भारतीय गोर्खा प्रजातान्त्रिक मोर्चा केन्द्रिय संस्थापक अध्यक्ष अनित थापाले बीस प्रतिशत बोनसको लागि पहल गरिदिएको बताए। उनीहरूले बोनस दशैं अघि नै सठीक समयमा पाओस् भनी बताए।
सिपाहीधुरा चियाबारीमा पनि हिल तराई डुवर्स प्लान्टेशन वर्कर्स युनियनको सभापति र सचिव निर्मला प्रधान, सल्लाहकार मिलन प्रधान, शिवखोला ग्राम पञ्चायतका प्रधान मोहनकुमार प्रधान, पञ्चायत समिति सदस्या दिक्षा छेत्रीको उपस्थितिमा गेट मिटिङ सम्पन्न गरिएको छ। तीनधारे महानदी समष्टिको सिलिम हिलमा सभापति सकिला तामाङ, सचिव अमर तामाङ लगायत अन्यहरुको उपस्थितिमा गेट मिटिङ गरिएको छ।
हिन्दुस्थान समाचार / हनोक
