डुवर्स, 25 अगस्त (हि.स.)। शहीद मेजर दुर्गा मल्ल स्मृति सेवा प्रतिष्ठान, चमर्ची-बानरहाट, जलपाइगढीद्वारा आयोजित ८१औं बलिदान दिवसमा शहीद मेजर दुर्गा मल्लको सालिग अनावरण साथै ३४औं नेपाली भाषा मान्यता दिवस समारोहमा गोर्खाल्याण्ड क्षेत्रीय प्रशासनको प्रमुख कार्यपाल अनित थापाको उपस्थितिमा सम्पन्न गरिएको छ।

कार्यक्रमलाई सम्बोधन गर्दै जीटीए प्रमुख अनित थापाले भने, 'मेरो भ्रमण कुनै राजनीतिक भ्रमण होइन। जातिगत नातामा म यहाँ आएको हुँ। जातिको निम्ति असल कार्यक्रम भएको छ आज।' थापाले भने, 'हामीमा आत्मविश्वास हुनुपर्छ कि हामी भारतीय नागरिक हौँ भनेर। कसैले केही भन्यो भन्दामा नै आवेशमा आउनु हुँदैन। आत्मविश्वास हाम्रो ठूलो हतियार हो। हामीलाई ओहोदामा बसेका कुनै पनि व्यक्तिहरू प्रधानमन्त्री, मुख्यमन्त्रीले नराम्रो केही भनेको छैन अनि भन्दैन पनि। हाम्रो आत्मविश्वास कमजोर भयो भने हामीलाई नै गार्हो पर्छ। हाम्रो आत्मविश्वास बलियो हुनुपर्छ।'

उनले अघि भने, 'डुवर्समा म राजनीति गर्नु कहिले पनि आउँदिन। यहाँ राजनीति गर्दा विगतको दिनमा यहाँका जनताले धेरै दुःख पाएका छन्। हाम्रो जाति उन्नतिको बाटोमा लाग्नुपर्छ। राजनीतिमा अघि बढ्नुपर्छ। राम्रो राजनीतिक ओहोदाहरुमा पुग्न सक्नुपर्छ। हाम्रो राजनीतिलाई निरन्तरता दिन सक्नुपर्छ। हामीले 2017 मा जुन राजनीतिक यात्रा शुरु गर्यौ त्यसै राजनीतिको कारण डुवर्सले शान्तिको श्वास पनि फेर्नु पाएको छ। डुवर्सका गोर्खाहरूले आफ्नो भरमा आफ्नै खुट्टामा उँभिनु सक्नुपर्छ। डुवर्समा गोर्खा जातिको, गोर्खा संस्कृतिको कार्यक्रमहरुमा म मेरो तर्फबाट हुने सबै सहयोग अनि सहभागिता दिनेछु। तर यहाँ म राजनीति गर्नु आउने छैन।'

हिन्दुस्थान समाचार / हनोक