खरसाङ, 25 अगस्त (हि.स.)। तीनधारे महानदी समष्टिको घैयाबारी प्राथमिक स्वास्थ्य केन्द्रमा चलिरहेको फार्मसिस्टको अभाव समाधान गरिएको छ। अस्पतालमा फार्मसिस्टको अभावको कारणले स्थानीय मानिसहरुले धेरै समस्या भोगिरहेका थिए। स्थानीय मानिसहरूको समस्यालाई ध्यानमा राख्दै यहाँ एकजना फार्मसिस्ट जीटीएको स्वास्थ्य विभागको तर्फबाट नियुक्त गरिएको जानकारी प्राप्त भएको छ।

फार्मसिस्ट आजदेखि घैयाबारी अस्पतालमा नियुक्त भएर आएका छन्। फार्मसिस्टलाई अखिल भारतीय गोर्खा विद्यार्थी महासंघ तीनधारे महानदी समष्टिका सभापति सुभम प्रधान र अन्य पदाधिकारीहरु र घैयाबारी तीन ग्राम पञ्चायतकी प्रधान सुष्मा वाईबा र उप प्रधान केवल राईले स्वागत जनाए।

उक्त भेटघाटपछि पत्रकारहरुसित कुराकानी गर्दै विद्यार्थी महासंघ तीनधारे महानदी समष्टिका सभापति सुभम प्रधानले विद्यार्थी महासंघको तर्फबाट गत 5 अगस्तको दिन यस विषयमा जीटीएको प्रमुख कार्यपाल अनित थापा र स्वास्थ्य विभागको कार्यकारी निर्देशकलाई लिखित ज्ञापन बुझाइएको बताउँदै समस्याको सामाधान गरिएकोमा जीटीए प्रमुख अनित थापा लगायत स्वास्थ्य विभाग, सभासद, घैयाबारी तीन ग्राम पञ्चायतलाई धन्यवाद दिएका छन्।

हिन्दुस्थान समाचार / हनोक